Dili, 07 Novembru 2025 – Ministériu Juventude Desportu Arte no Kultura (MJDAK) ohin liuhosi Diresaun Jerál Juventude, fó sai Komunikadu Imprensa konaba preparasaun finál ba Komemorasaun Masakre Santa Cruz ba dala XXXIV no Selebrasaun Loron Nasionál Juventude ba dala XX, ne'ebé monu iha loron 12 Novembru 2025.

Diretór Jerál Juventude, Sr. David Tomas De Deus, hatete katak tinan ida-ne'e marka hanesan pontu virajen estratéjiku ba MJDAK atu fó fokus ba dezenvolvimentu juventude iha baze no Munisípiu sira.

Rotasaun ba Aileu nu'udar Prioridade

Bazeia ba Lei N.o 10/2005, ne’ebé rekoñese Masakre Santa Cruz 1991 nu’udar Loron Nasionál Juventude, MJDAK iha tinan 2025 deside hodi hahú halo selebrasaun rotativamente ba munisípiu sira.

"Liuhosi rotasaun ba Munisípiu Aileu, ita hatudu katak juventude iha área rurál nu'udar prioridade sentrál ba Governu," tenik Sr. David Tomas De Deus. Selebrasaun ne'e sei hala'o ho tema: "Hau Timoroan, Orgullu ho Hau nia Nasaun," hosi loron 8 to'o 12 Novembru.

Atividade sira-ne'e organiza ho koordenasaun husi Sentru Juventude Munisípiu Aileu, Autoridade Munisípiu Aileu, no organizasaun juventude lokál.

Follus ba Inovasaun no Komemorasaun Dignu

Selebrasaun loron lima (5) iha Aileu foka iha dezenvolvimentu kompetisaun no dezemvolvimentu rekursu umanus:

·       Feira Nasionál no Konsertu Muzika hahú hosi loron 8 to'o 12 Novembru.

·       Kompetisaun Empoderamentu Juventude Inovadór: Selesaun konklui ona no hein katak rezultadu sei anunsia iha loron 12 Novembru, hodi fó rekoñesimentu no apoiu ba joven sira-nia kriadade.

·       Aksaun Sosiál no Reflorestasaun: Realiza mós atividade sira hanesan dapur ba asrama ismaik (finaliza ona) no kuda aifunan, hodi reflete joven sira-nia responsabilidade sosiál.

Iha parte komemorasaun, MJDAK fó konfiansa ba Jerasaun 12 (J-12) atu organiza Misa, Reflesaun Kalan (11 Novembru), no Kari Aifunan iha Dili. Liuhosi apoiu orsamentál ba 63 Postu Administrasitivu iha Timor laran, MJDAK garante Komemorasaun Masakre Santa Cruz sei hala'o ho dignu iha baze to'o nasionál.

Orsamentu no Transparénsia

Atividade boot nasionál ne'e hetan apoiu finanseiru ne'ebé forte:

·       Governu RDTL (MJDAK): Aloka orsamentu totál $29,991.00 USD.

·       Parseiru Estratéjiku: Kontribuisaun signifikativa mai hosi Plan International ($10,500.00 USD) no UNFPA ($6,005.00 USD), ne'ebé hatudu konfiansa internasionál ba vizaun dezenvolvimentu juventude MJDAK nian.

#MídiaMJDAK