DILI, 7 Outubru 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, akompaña Sua Exelénsia Primeiru Ministru (PM) Kay Rala Xanana Gusmão hodi hasoru malu ho Ministru Kultura Repúblika Indonézia, Fadil Zon, no ninia komitiva. Enkontru ne’e, ne’ebé akompaña mós hosi Embaixadór Indonézia iha Timor-Leste, Sua Exelénsia Octo Dorinus Manik, hala’o iha Sala Fronteira Marítima, Palásiu Governu.

Ligasaun Kulturál nu'udar Ponte Amizade

Ministru Kultura Repúblika Indonézia, Fadil Zon, espresa ninia haksolok tebes hodi hasoru PM Xanana Gusmão, ne’ebé iha interese boot tebes ba relasaun entre Timor-Leste ho Indonézia.

“Ha'u mai nu’udar Ministru Kultura, ho esperansa atu harii ligasaun kultura hodi hametin liután entre nasaun rua ne’e,” dehan Ministru Fadil Zon.

Nia informa katak ekipa Indonézia nian halo ona atividade oioin iha Sentru Kultura Indonézia, inklui diskusaun no workshop kona-ba filme, literatura (iha Sala Leitura Xanana), kulinária, gastronómia, no tekstil.

Proposta Harii Muzeu iha Taman Mini

Ministru Kultura Fadil Zon hato’o mós inisiativa atu harii Muzeu ida (iha área uluk nu’udar Pavilhão Timur-Timur) iha Taman Mini Indonézia Indah.

“Uluk iha pavillaun Timur-Timur, maibé Timur-Timur la iha ona, agora sai ona Timor-Leste. Entaun ami hakarak kria muzeu ida ne’ebé bele hatudu mós Timor-Leste nia amizade no kultura,” nia esplika.

Nia espera katak Muzeu ne'e bele sai nu’udar ponte kulturál hodi hametin relasaun entre nasaun rua ne’e liuhosi ligasaun ba komunidade sira.

Kolaborasaun ba Festival Fronteira

Ministru Fadil Zon hato’o sentimentu gratidaun no subliña katak Indonézia apoia maka’as festival kulturál lubuk ida ne’ebé hala’o iha Fronteira, inklui kolaborasaun ho Governu Rejionál Nusa Tenggara Timur (NTT) atu Fronteira Cup sira sai nu’udar plataforma ba relasaun di’ak.

Nia mós konvida Ministru Kultura Timor-Leste nian (MJDAK) atu partisipa iha fulan oin ba inisiativa kulturál Indonézia nian, Indonézia Pasífiku, nu’udar atividade kulturál entre nasaun sira ne’ebé harii iha Pasífiku.

MJDAK Simu Ho Ideia Foun

Iha fatin hanesan, Ministru Nelyo Isaac Sarmento hateten katak reuniaun kortizia ho Primeiru Ministru iha buat barak mak diskute. Maibé pontu importante husi diskusaun ne’e mak oinsá atu fortifika relasaun Timor-Leste ho Indonézia liu husi Kultura.

"Ideia foun ne’ebe hato’o mai hodi ita haree ba oin atu iha koperasaun ne’e hodi hametin liu tan koperasaun liuhosi nota de entendimentus balun atu nune’e ita la’o fortifika ita-nia relasaun liu hosi atividade kulturais," afirma Ministru MJDAK.

Ministru Sarmento mós konkorda katak kolaborasaun ne'e importante tebes, liuliu ba jerasaun foun sira, atu partisipa iha workshop no atividade sira ne’ebé iha relasaun ho rezisténsia no kultura.

#MídiaMJDAK