ERMERA, 19 Setembru 2025 — Ministériu Juventude, Desportu, Arte no Kultura (MJDAK), liuhosi Diresaun Nasionál Dezenvolvimentu Juventude (DNDJ), ensera ona formasaun kona-ba relasaun saudavel ba joven na'in-25 iha Postu Administrativu Hatolia A, Munisípiu Ermera. Atividade ne'e, ne'ebé hetan apoiu husi UNFPA, hala'o durante semana ida (15-19 Setembru) iha Salaun Parokiál São Francisco Xavier.

Serimónia enseramentu partisipa hosi reprezentante Diretór Nasionál Dezenvolvimentu Juventude, Juvenal de Araújo, hamutuk ho reprezentante Administradór Postu Hatolia A, Duarte Martins.

Hasa'e Koñesimentu ba Saúde Reprodutiva

Reprezentante MJDAK, Juvenal de Araújo, hateten katak objetivu esensiál husi formasaun ne'e maka atu responde ba joven sira-nia nesesidade kona-ba saúde seksuál no reprodutiva.

"Joven barak mak seidauk iha koñesimentu naton kona-ba saúde seksuál no reprodutiva. Tanba ne'e mak Ministériu ho UNFPA halo akordu atu realiza formasaun ne'e, atu joven sira bele iha koñesimentu naton kona-ba sira-nia an rasik no oinsá atu halo relasaun ida ne'ebé saudavel no seguru," dehan Juvenal de Araújo.

Prepara Joven ba Futuru iha Era Dijitál

Iha ninia diskursu, reprezentante Administradór Postu Hatolia A, Duarte Martins, subliña katak formasaun ne'e importante tebes ba joven sira, tanba ho dezenvolvimentu teknolojia, risku ba relasaun la saudavel mós sa'e.

Nia agradese ba MJDAK no UNFPA ne'ebé kolabora ho Sentru Juventude Ermera hodi fó matenek ne'e ba joven sira, atu bele prepara sira ba futuru ho konsiénsia no matenek.

Partisipante hamutuk na'in-25, hamutuk ho formadór na'in-tolu no funsionáriu MJDAK husi Sentru Juventude Ermera, partisipa iha formasaun ne'e.

#MídiaMJDAK