DILI, 21 Maiu 2026 – S.E. Ministru Juventude, Desportu, Arte no Kultura (MJDAK), Nelyo Isaac Sarmento (NIS), ofisialmente halo abertura ba Liga Futebol Timorense Epoka 2026 husi primeiru divizaun nian, ho jogu abertura entre Karketu Dili FC kontra AS Marca FC. Jogu ne'e realiza iha Estádiu Munisipal Dili, ho atmosfera animadu no partisipasaun boot husi komunidade futebol nian.

Iha diskursu, Ministru Nelyo hatete katak buat ne'ebé ita hotu hein futebol mak mai dadaun ona. Nia espera katak kompetisaun ida-ne'e bele hetan prestasaun diak hodi anima komunidade no hametin espíritu desportivizmu iha nasaun.

"Importante mak atividade ne'ebé ita iha, no ita hotu-hotu tenke suporta máksimu ba eventu sira-ne'e no fo ajuda boot ba ita-nia jogador sira, atu bele joga ho diak hodi reprezenta aban-bainrua liu husi FFTL."

Ministru Nelyo mós husu ba maluk sira hotu atu mai hamutuk hodi anima no deseja sorte ba klubu sira hotu ne'ebé partisipa iha kompetisaun ida-ne'e.

Partisipa diretamente husi jogu abertura ne'e mak: Prezidente Federasaun Futebol Timor-Leste (FFTL), Vise-Prezidente Tenente Jeral, Xefi Estadu Maior F-FDTL, Reprezentante Komisariu Jeral PNTL, Diretor Jeral Desportu MJDAK, Diretor Jeral Juventude MJDAK, Xefi Departamentu Selesaun Nasional MJDAK

Prezensa husi autoridade sira-ne'e hatudu apoiu forte husi Governu no instituisaun seguransa ba dezenvolvimentu futebol nasionál.

Liga futebol Timorense epoka 2026 ne'e marka hahu foun ba kompetisaun futebol iha nasaun, ho partisipasaun husi klubu sira husi munisípiu hotu-hotu. Kompetisaun ida-ne'e mós sai plataforma importante hodi dezenvolve talentu foun no hasa'e kualidade futebol iha Timor-Leste, hodi prepara jogador sira ba kompetisaun iha nível rejional no internasionál.

MJDAK reafirma kompromisu atu kontinua suporta dezenvolvimentu futebol no desportu iha jerál, liu husi programa estratejiku no apoiu finanseiru ba federasaun no klubu sira.

#MediaMjdak