MALIANA, 27 Juilu 2026, GKI—Sentru Juventude Munisipiu Bobonaro (SJMB), iha Postu Maliana, Suku Odomau, hahu loke  rejistrasaun kursu regular Lian Ingles no Komputador ba foinsae sira. Atividade kursu regular SJMB ne’e, hetan apoiu fundus operasional ho montante dolar amerika rihun ualu atus lima resin  husi MJDAK, liu husi Dirasaun Nasional Asosiativismu Juventude (DNAJ).  

Atividade kursu regular  ne’e, jestor SJMB implementa tuir planu trimestral, ne’ebe trimestral I (Janeiru-Marsu), trimestral II (Abril-Juinu), trimestral III (Juilu-Setembru) no trimestral IV (Outubru-Dezembru).

Diretur Sentru Juventude Munisipiu Bobonaro, Alcino da Costa, informa ba Mediamjdak, Segunda (27/7), esplika, tinan 2026, SJMB  hetan fundu operasional husi MJDAK atraves husi diresaun nasional asosiativismu juventude.

Alcino hatutan,  progresu kursu husi Q1 (trimestral I)  to’o Q2 (trimestral II), SJMB halo atividade reguler barak, maibe  iha atividade Q1, Alcino informa,  halo ativiadde  kursu Ingles,   Komputador nomos kursu Lian Korea. “Atividade Q2, ami halo tan formasaun edukasaun sivika ba foinsae sira,”  nia esplika.

Agora planu ba Q3, tuir Alcino,  loke hela rejistrasaun no lolos ne’e, abertura, Segunda (27/7). Maibe, tuir Alcino la konsege abertura rejistrasaun  tanba failansu tekniku, entau foin abertura rejistrasaun ba kursu Lian Ingles no kursu komputador, tersa (28/7). Alcino planeia iha Q3 no Q4, sei implementa atividades formasaun relasaun saudavel no edukasaun siviku ba foinsae iha eskolas.  

Tuir Alcino, difikuldades ne’ebe hasoru durante ne’e, limitasaun sala formasaun hodi akumula foinsae ho numeru barak. Tanba ne’e, kada kursu regular, Alcino disidi, simu foinsae nain 25.   #MediaMjdak#