VENEZA, (GCI-MJDAK) — Sua Exelénsia Sekretáriu Estadu Arte no Kultura (SEAK), Sr. Jorge Cristóvão, iha loron 7 fulan maiu tinan 2026 foin lalais ne’e inaugura ofisialmente Pavillaun Timor-Leste ho títulu "Across Words" iha Espozisaun Internasionál Arte Biennale di Venezia ba dala 61, iha Itália. Eventu ne’e marka fali istória foun ba diplomásia kulturál Timor-Leste nian iha arte kontemporáneu prestijiozu liu iha mundu.

Partisipasaun tinan ne’e reprezenta prezensa ofisiál ba dala rua nian ba Estadu Timor-Leste iha Biennale, maibé ba dala primeiru okupa espasu istóriku Arsenale di Venezia. Através de obra husi artista Edson Caminha, Juventino Madeira, no Verônica Pereira, Timor-Leste lori narativa kona-ba memória istórika no identidade nasionál ba audiénsia globál.

"Ita sente orgullu hodi fahe ita-nia kultura únika ho mundu iha Bienal ne'e," Sr. Jorge Cristóvão subliña iha ninia diskursu serimónia abertura.

Iha pavillaun laran, artista Verônica Pereira aprezenta obra tais ne’ebé hakerek ho naran foin-sa’e sira ne’ebé lakon vida iha Masakre Santa Cruz. Alende ne’e, Juventino Madeira lori instalasaun audiovizuál kona-ba Masakre 12 Novembru, ne’ebé hetan akompañamentu sonoru husi Edson Caminha liuhusi instrumentu tradisionál no modernu.

Abertura ne’e hahú ho rituál Verahana ne’ebé Edson Caminha aprezenta nu’udar simbulu hodi husu lisensa husi bei-ala sira no simu vizitante sira iha espasu espozisaun nian. Eventu ne’e halibur hamutuk konvidada, kuradór, no kolekcionadór sira husi nasaun oioin ne’ebé hakarak koñese liután lian klamar no rezisténsia Timor-Leste nian.

Sua Exelénsia Sr. Jorge Cristóvão mós aproveita kbiit ne’e hodi partisipa iha abertura pavillaun Singapura no Indonésia, nu’udar parte husi esforsu Governu nian hodi hametin relasaun kulturál ho nasaun viziñu sira. Espozisaun "Across Words" sei kontinua nakloke ba públiku internasionál to’o loron 22 Novembru 2026.