DILI, 13 Agostu 2025 – Ministériu Juventude, Desportu, Arte no Kultura (MJDAK), liuhosi Gabinete Komunikasaun no Informasaun (GCI), hala'o atividade "Kafé Hamutuk ho Mídia" hodi promove transparénsia kona-ba regulamentasaun arte marsiál (AM).

Kordenadora GCI, Sra. Aida de Jesus Soares, hamutuk ho xefe departamentu na'in-rua (2), konvida Prezidente Komisaun Reguladora Arte Marsiál (KRAM), Sr. Octávio da Conceição, atu partilla informasaun detallada kona-ba Proposta Lei ne'ebé atu halo alterasaun ba Lei Nú. 5/2017. Atividade ne'e hala'o iha Salaun Ema ho Defisiénsia (EhD) MJDAK, Lecidere.

Kompeténsia KRAM: Asegura Regulamentu Desportivu

Prezidente KRAM, Sr. Octávio da Conceição, hatete katak Proposta Lei foun ne'e atu fó kompeténsia máksimu ba KRAM hodi asegura katak atividade Arte Marsiál no Rituál sira la'o tuir regras desportu ne'ebé vigora iha Timor-Leste.

Nia esplika funsaun importante KRAM nian:

• Aprovizasaun: Halo aprovizasaun ba organizasaun, klube, no eskola (Ranting) arte marsiál sira iha teritóriu tomak.
• Monitorizasaun no Fiskalizasaun: Kontrola atividade pratika arte marsiál atu la'o tuir ritmu no doutrina organizasaun nian.
• Diretiva: Progresu diretiva sira nu'udar matadalan kondisaun legál hodi kontrola atividade.

Esforsu Governu hodi Hametin Pás

Sr. Octávio da Conceição mós informa katak KRAM servisu hamutuk ona ho Ministériu Interior, Ministériu Justisa, no Ministériu Edukasaun, inklui mós Ministériu relevante sira seluk, hodi halo edukasaun sívika no organiza kondisaun hotu-hotu atu Timoroan hotu bele moris iha Pás no estabilidade nia laran.

Kona-ba dezenvolvimentu Arte Marsiál, Prezidente KRAM ne'e esplika katak polítika IX Governu Konstitusionál aposta ba área ne'e, maski implementasaun la'o neineik tanba sirkunstánsia balun, inklui membru balu ne'ebé la kumpri rejimentu hodi perturba orde públika.

Mudansa Polítika ho Lei Foun

Atu rezolve dezafiu ne'e, Governu mai ho polítika foun atu halo alterasaun ba Lei Nú. 5/2017. Proposta Lei ne'e aprezenta husi Ministériu Interior, MJDAK, no Ministériu Justisa, no hetan ona apresiasaun husi Konsellu Ministru.

Proposta ne'e haruka ona ba iha Komisaun A Espesializada Parlamentu Nasionál nian. "Kuandu lei ida ne'e aprova, sei iha mudansa polítika boot ba KRAM nia funsionamentu no serbisu tuir lei foun ne'ebé sei mai," Sr. Octávio da Conceição hateten.

Kafé Hamutuk ne'e partisipa husi jornalista sira hanesan RTTL-EP, Timor Post, Tatoli-IP, no mós média online no televizaun váriu sira, hamutuk ho staff husi GCI MJDAK. KRAM sei kontinua funsiona to'o loron 31 Dezembru 2025.

#MídiaMJDAK