DILI, 10 JUÑU 2026 – Direção Nasionál Dezenvolvimentu Juventude (DNDJ) iha Ministériu Juventude, Desportu, Arte no Kultura (MJDAK), ne'ebé lidera husi Diretór Nasionál João Lemos, hamutuk ho ekipa juri, hala'o teste intrevista ba kandidatu hamutuk na'in-24 ne'ebé sei reprezenta Timor-Leste iha Tailandia. Atividade ne'e hala'o iha Edifísiu MJDAK, Lecidere, Dili.

Objetivu husi faze teste intrevista ne'e hanesan faze selesaun ikus atu identifika kandidatu ne'ebé iha kualifikasaun di'ak, liuliu iha lian Inglés, atu bele reprezenta nasaun iha Programa Youth United for Road Safety ASEAN 2026, ne'ebé sei realiza iha Tailandia durante semana ida. Programa ne'e hanesan iniciativa importante atu envolve joven sira iha kampuña seguransa trafiku no promove konsiensia kona-ba estrada ne'ebé seguru iha rejiaun ASEAN.

Kandidatu sira hatudu vontade no partisipasaun maksimu durante faze teste, ne'ebé avalia husi ekipa juri kompostu husi Carlos Cunha dos Santos no Miranda Supatmi. Teste intrevista ne'e foka ba kapasidade komunikasaun, koñesimentu kona-ba seguransa trafiku, no kompromisu kandidatu sira-nian atu kontribui ba programa rejionál ne'e.

DNDJ MJDAK reafirma kompromisu atu kontinua apoia joven Timor-Leste nian atu partisipa iha atividade internasionál, hodi hadi'a kapasidade lideransa no representa nasaun iha palku rejionál no globál.

#MediaMjdak