DILI, 28 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa no halo abertura ofisiál hamutuk ho Embaixadór Indonézia, Sr. Okto Dorinus Manik ba Espozisaun Ensinu Superiór 2025, ne'ebé realiza iha Sentru Kultura Indonézia (Pusat Budaya Indonesia - PBI), Caicoli, Dili.

Eventu ne'e, nu'udar rezultadu husi kooperasaun entre MJDAK no Embaixada Indonézia (KBRI), sai fatin importante hodi hametin kualidade rekursu umanu Timor-Leste nian iha tempu ne'ebé RDTL foin sai membru ASEAN.

Mensajen Ministru Nelyo Isaac: Timor-Leste nu'udar Poténsia 

Iha nia diskursu, Ministru Nelyo Isaac Sarmento realsa importánsia istóriku adezaun Timor-Leste nian ba ASEAN ba dala-11, ne'ebé la'ós de'it asuntu polítiku, maibé mós responsabilidade atu harii forsa ida iha rejiaun.

"Foin loron ida mak ita ofisiálmente sai membru ASEAN. Ita-nia responsabilidade no determinasaun mak tenke memória katak ita-nia rejiaun ne'e sai forsa ida, la'ós polítika de'it, maibé mós forsa teknolojia ba futuru," dehan Ministru Nelyo Isaac.

Nia apresia komitmentu PBI no KBRI nian hodi fó oportunidade ba joven Timoroan, tanba relasaun edukasionál entre nasaun rua ne'e forte, ho lideransa barak agora dadaun ne'ebé produtu husi sistema edukasaun Indonézia nian.

Prioridade Governu: Ministru husu ba partisipante sira atu aproveita oportunidade ne'e hodi estabelese kooperasaun entre dosente no instituisaun edukasaun, hodi bele inova no prepara forsa-traballu profisionál iha futuru.

"Governu Timor-Leste nia komitmentu no planu ne’e Edukasaun ba oan-mane no oan-feto Timor-Leste nian mak númeru ida... liuliu ona sai família ASEAN, ha'u fiar katak iha tempu badak, sei iha komunidade Timor-Leste boot iha área ASEAN nian," nia afirma.

Vizaun Embaixadór Manik: Expo nu'udar Porta ASEAN

Embaixadór Indonézia ba Timor-Leste, Sr. Okto Dorinus Manik, hatudu nia kontente tanba espozisaun ne'e hala'o iha tempu loos (istimewa) ho adezaun Timor-Leste nian ba ASEAN.

Embaixadór Manik realsa katak expo ne'e, ne'ebé hetan partisipasaun husi Instituisaun Ensinu Superiór Indonézia 65, la'ós de'it agenda tinan-tinan nian, maibé símbolu husi komitmentu Indonézia nian atu reforsa kooperasaun liuhosi edukasaun.

"Adezaun ba ASEAN loke ona kapítulu foun ida, liuliu iha área sira ensinu superiór nian no mobilizasaun rekursu umanu sira. Espozisaun edukativu ne'e hakarak insentiva mobilizasaun iha sudeste aziátiku", nia esplika.

Nia mós hateten katak Bolsu estudu no estudante Timoroan ne’ebé eskola iha Indonézia to’o ona ema na'in-11,400. Embaixadór remata nia diskursu ho lema ASEAN nian: “Together We Rise”

#MídiaMJDAK