DÍLI, 5 Agostu 2025 – Ministériu Finansas (MF), liuhosi Komisaun Revizaun Orsamentu (CRO), ofisiálmente hahú ona sesaun audiénsia ho liña ministeriál sira, atu rona no avalia Proposta Orsamentu Jerál Estadu (OJE) ba tinan 2026. Iha loron uluk ne’e, Ministériu Juventude, Desportu, Arte no Kultura (MJDAK) hetan oportunidade atu hato’o ninia proposta ba CRO.

Ministra Finansas, Sua Exelénsia Santina Viegas Cardoso, subliña importánsia husi prosesu ne'e:

"Prosesu audiénsia ne’e sei fó oportunidade ba Ministériu sira atu esplika prioridade no justifika alokasaun orsamentu, hodi permite avaliasaun objetivu ba parte CRO."

Proposta Orsamentu no Prioridade Estratéjiku

MJDAK nia Proposta OJE 2026 mak ho totál USD 13,658,305.00, ho orsamentu adisionál hamutuk USD 6,942,461.00 ne'ebé foka liuliu ba área juventude, fasilidade desportiva, no programa lideransa.

Proposta MJDAK fó prioridade ba inisiativa sira ne'ebé liga diretamente ho dezenvolvimentu nasionál: Jestaun Rekursu Umanu: Pagamentu funsionáriu no asesór sira. Infraestrutura: Manutensaun infraestrutura desportiva no projetu kapitál ba kampu futsal multifunsaun iha postu lima (5). Dezenvolvimentu Juventude: Programa Parlamentu Foinsa’e Nian (PFN). Desportu Federadu: Apoiu ba Liga Futebol Timor-Leste (LFTL).

Investimentu ba Futuru Nasionál

Ministru MJDAK, Sua Exelénsia Nelyo Isaac Sarmento, hatudu katak investimentu ida-ne'e nu'udar prioridade Governu Konstitusionál IX nian atu:

"Halo juventude sai lider foun, fasilita prátika desportiva ba komunidade, no kontinua sustenta visibilidade positivu husi Jogos CPLP 2025."

Prosesu audiénsia ne'e sei kontinua iha loron sira tuir mai ho liña ministeriál seluk, ho objetivu atu finaliza preparasaun Proposta OJE 2026 molok hato’o ba Parlamentu Nasionál atu hetan debate.

#MídiaMJDAK