DILI, 6 JULLU 2026 (GCI-MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, sai hanesan inspetór hodi hasa'e bandeira nasionál iha residénsia MJDAK, Lecidere, Dili, loron 6 Jullu 2026, iha sinal hodi hahú periodu foun ba planu estratejiku ministeriu nian.

Iha momentu ne'e, MJDAK tama ona iha prosesu preparasaun ba Orsamentu Jerál Estadu 2027. Tanba ne'e, Ministru Nelyo husu ba kada departamentu ka direksaun atu hanoin no identifika programa saida mak atu halo ba tinan 2027, ho baze ba mudansa kontestu atual no dinamika populasaun.

Iha diskursu nian, Ministru Nelyo enfatiza katak ministeriu ida-ne'e funsiona ona durante tinan barak, maibé tenke para deit ho programa sira ne'ebé hahu husi tinan sanulu nian. Nia hateten katak ita labele dezmaia ho programa sira ne'ebé uluk nian deit no tenke hanoin inovasaun ba programa sira ne'ebé tuir kontestu agora nian, liuliu ba joven sira-nia hanoin, mudansa ba organizasaun desportiva sira-nia hanoin, no arte kultura nian hotu.

Ministru Nelyo hatutan katak diretor sira no xefi departamentu sira labele kontinua ho programa ne'ebé hanesan desde tinan sanulu to'o agora, no tenke hanoin foun ona. Nia mós kritika badak kona-ba forma diskusaun iha reuniaun sira, ne'ebé dala ruma la loke ema nia kakutak, no husu ho refleksivu kona-ba programa saida mak direksaun bele halo tuir orsamentu ne'ebé tun ka sa'e.

Nelyo subliña katak kargu xefia sira tenke iha inovasaun, tanba laiha inovasaun katak laiha programa ne'ebé tuir karakteristika. Nia dehan katak agora dadaun ita tama ona iha fulan klaran, ne'e tempu atu hare fila fali servisu husi fulan Janeiro to'o Junhu hodi sukat servisu iha direksaun sira. Nia husu mós ba direksaun sira atu asegura katak kalendáriu programa iha konsisténsia, no se la iha, tenke halo fali foun no orienta funsionáriu hotu-hotu.

Ministru Nelyo mós konsidera katak semana hirak tuir mai ne'e atividade lubuk ida sei realiza no tenke konsentra ba servisu, liu-liu funsionáriu sira tenke fo atensaun ba prezensia no kompromisu servisu nian tuir lei. Nia taka diskursu ho apelu ba kargu xefia sira atu halo koordenasaun no profesionalizmu iha servisu.