ATAÚRO, 19 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa no nu'udar Inspetór ba serimónia komemorasaun ofisiál Aniversáriu FALINTIL ba Dala-50. Serimónia istóriku ne'e hala'o iha Administrasaun Autoridade Ataúro, Suku Maumeta Vila, hodi komemora prosesu luta libertasaun nasionál.

Dezafiu FALINTIL: Husu Disiplina ba Jerasaun Foun

Iha ninia diskursu, Ministru Nelyo Isaac Sarmento subliña katak loron espesiál ne'e hanesan momentu di'ak ida atu reflete fali kona-ba prosesu ukun-rasik-an ne'ebé hetan liuhosi esforsu boot no hasoru dezafiu oioin.

"FALINTIL mosu ho difikuldade no dezafiu, maibé ho kbiit atu lori povu no rai ida-ne'e husi dezafiu ba independénsia. Atu fó valór ba erói sira-ne'ebé lakon sira-nia vida, atu realiza mehi ne'ebé sira husik hela mai ita," Ministru Nelyo dehan.

Nia fó mensajen klaru ida ba joven sira katak sira tenke aprende husi FALINTIL kona-ba disiplina iha área hotu-hotu: disiplina iha ko'alia, disiplina iha asaun, no disiplina iha responsabilidade.

"Ami oferese ami-nia vida ba ukun-rasik-an, atu imi, joven sira, uza imi-nia matenek no kapasidade hodi kontribui ba nasaun. Nasaun ida-ne'ebé hetan ho susar, labele fila fali ba kotuk, maibé la'o nafatin ba oin hodi alkansa objetivu ba povu no nasaun nia di'ak," Ministru konklui.

Vizaun Nasionál no Internasionál

Tuir Reprezentante Xefe Estadu Maiór-Jenerál FALINTIL-Forsa Defeza Timor-Leste (F-FDTL), Maiór Francisco Xavier Dos Reis Neto, komemorasaun ne'e hanesan momentu dahuluk hodi selebra aniversáriu FALINTIL iha Autoridade Administrasaun Ataúro.

Komemorasaun tinan ne'e, ne'ebé organiza husi Ministériu Defeza no F-FDTL, hala'o ho tema sentrál: "Habelar Dame ba Mundu." Maiór Neto esplika katak tema ne'e reflete Timor-Leste nia jornada husi konflitu ba dame no aspira atu fahe ninia esperiénsia rekonsiliasaun ba komunidade internasionál.

Serimónia ne'e partisipa másimu husi Prezidente Autoridade Administrativa Ataúro, funsionáriu Governu, instituisaun F-FDTL, PNTL, PNDS, organizasaun rezisténsia, estudante, no hetan mós prezensa husi turista internasionál sira.

#MídiaMJDAK