DILI, 22 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, simu ona Ekipa Nasionál Taekwondo iha Dili hodi diskute kona-ba preparasaun finál atleta sira nian atu partisipa iha eventu boot SEA Games ne’ebé sei hala’o iha Tailándia.

Enkontru ne'e nu'udar parte husi komitmentu Governu nian hodi fó apoiu morál no lojístiku ba atleta nasionál sira ne'ebé sei reprezenta nasaun.

Ministru Husu Preparasaun Másimu no Mentalidade Forte

Iha sorumutu ne'e, Ministru Nelyo Isaac Sarmento hato’o nia fiar no husu ba atleta Taekwondo sira atu uza tempu ne'ebé iha hodi prepara ho másimu no ho mentalidade ne'ebé di'ak.

"Imi sei lori bandeira Timor-Leste nian iha kompetisaun internasionál. Ne'e mak orgullu boot ida ba ita-nia nasaun," Ministru afirma.

Nia subliña katak Governu nian fiar tomak ba sira-nia kapasidade hodi bele lori susesu. "Ha'u fiar imi bele oferese medalla mai ita-nia nasaun," dehan nia.

Apoiu ne'e husi MJDAK nu’udar sinale katak Governu Sentrál apoia maka'as no otimista ho kapasidade atleta Taekwondo sira nian hodi hatudu prestasaun ne'ebé di'ak tebes iha SEA Games 2025.

#MídiaMJDAK