DILI, 18 Abríl 2026 (GCI/MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa direita iha serimónia enserramentu no entrega prémiu ba kampionatu nasionál Karaté-Do "Taça Xanana Cup 2026", ne’ebé hala’o iha Jináziu Desportu Dili (GDD), sabadu ne’e.

Kampionatu ne’e sai nu’udar "ezame" boot ida ba Federasaun Karaté-Do Timor-Leste (FEKATIL) hodi foti faktu no avaliasaun ba kualidade atleta sira, tantu iha kategoria Seniór no Juniór, antes tama ba preparasaun másimu ba eventu internasionál sira.

Investimentu Estratéjiku ba Prestasaun

Iha nia intervensaun, Ministru Nelyo Isaac Sarmento (NIS) reitera katak Karaté tama iha lista "modalidade prioritáriu lima" ne’ebé Governu dudu hodi lori naran di’ak Timor-Leste nian iha arena internasionál.

"Tinan ne'e Governu fó apoiu másimu. Ba 'Taça Xanana Cup'  no ba kategoria Juniór ne’ebé sei ba kompete iha nível internasionál, Governu prepara  orsamentu purvolta de $70 mil. Apoiu boot ne'e presiza responde ho prestasaun," dehan Ministru NIS.

Governante ne'e mós fó avizu katak apoiu finanseiru ba futuru sei bazeia ba "meritokrasia". Se Karaté la hatudu rezultadu ne’ebé diak, Governu sei foti fali orsamentu ne’e hodi fó fali ba federasaun seluk ne’ebé hatudu prestasaun di’ak liután.

Preparasaun ba SEA Games no Parseira ho Japaun

Alende foku ba SEA Games 2027 iha Malaysia, Karaté mós sei partisipa iha ASEAN Games iha Bali, Indonesia. Hodi hasa'e kualidade tékniku, MJDAK kordena hela ho Embaixada Japaun hodi husu voluntáriu ka treinadór kualifikadu sira hodi mai fó formasaun ba atleta no treinadór lokál sira.

"Ita presiza treinadór ne'ebé kualifikadu. Ha'u enkoraza federasaun hodi labele hein de'it Governu, maibé tenke proativu kria kooperasaun ho parseiru internasionál sira iha rejiaun Ázia nian," Ministru NIS subliña.

Voz husi Munisípiu: Dezafiu Fasilidade no Arbitrajen

Iha sorin seluk, treinadór husi Munisípiu Aileu, António da Cruz, maski orgullu tanba konsege rekolla medalla osan-mutin (prata) ha’at, nia mós hato’o dezafiu ne’ebé atleta munisípiu sira hasoru.

"Ami-nia preparasaun ladun másimu tanba menus fasilidade no difisil atu akumula atleta sira ne'ebé barak mós eskola iha Dili. Ba oin, ami rekomenda ba komisaun organizadora hodi fó mós formasaun ba árbitru sira, atu nune'e desizaun iha tauk laran bele klaru no justu ba hotu-hotu," dehan treinadór ne’e.

Rezultadu Finál

Kampionatu Nasionál Karaté-Do "Taça Xanana Cup 2026" remata ho susesu, ne’ebé Ekipa FEKATIL A sai nu’udar dezempeñu di’ak liu no konsege foti Taxa Rotativa 2026.

Iha serimónia ne’e, Ministru NIS akompaña husi Diretór Jerál Desportu, João M. Rodrigues, Vise-Prezidente CDTL, no estrutura tomak FEKATIL nian.