DILI, 9 JANEIRU 2026 – Ministru Juventude, Desportu, Arte no Kultura (MJDAK), Sua Ekselénsia Nelyo Isaac Sarmento, husu ba inan-aman sira atu fó suporta másimu ba labarik sira ne’ebé partisipa iha akademia futeból, liuliu iha kestaun alimentasaun no tempu deskansa, tanba futuru futeból nian hahú husi preparasaun ohin nian.

Liafuan hirak ne’e hato’o husi Governante ne’e durante seremónia abertura “Opening Ceremony MJDAK Football Youth Team” ne’ebé hala’o iha Kampu Futeból Becora, Dili, sesta-feira ne’e.

Ministru Nelyo Isaac (NIS) subliña katak akademia ida-ne’e mak kontinuasaun husi planu estratéjiku durante tinan rua ne’ebé MJDAK dezenvolve hamutuk ho Governu Koreia, liuhosi Ajénsia Kooperasaun Internasionál Koreia (KOICA).

“KOICA servisu hamutuk ho Governu Timor-Leste iha parte rua ba dezenvolvimentu futeból: primeiru mak dezenvolvimentu kbiit nian liuhosi kampu no dormitóriu ba sentru labarik sira, no segundu mak sistema edukasaun futeból nian. Ita hanorin labarik sira atu aprende futeból tuir etapa ne’ebé loos,” dehan Ministru Nelyo.

Etapa Formasaun no Karátér

Iha ninia esplikasaun, Ministru NIS esplika katak labarik sira (feto no mane) ne’ebé foin atu aprende futeból sei hahú uluk iha Lecidere hodi haburas sira-nia domin ba bola. Bainhira sira hatudu ona abilidade no téknika ne’ebé di’ak, sira sei transfere mai iha akademia Becora nian.

“Iha ne’e, sira la’ós de’it aprende téknika tebe bola, maibé ita mós hanorin oinsa atu respeita malu iha kampu laran no joga ho espíritu desportivu ne’ebé aas,” Governante ne’e tenik.

Alende téknika, Ministru mós enfatiza katak mentalidade mak xave ba susesu. MJDAK iha planu atu kria "Meta Desportiva" hodi muda mentalidade jerasaun foun sira liuhosi edukasaun desportu nian. Tanba ne’e, kordenasaun ho inan-aman importante tebes hodi kontrola labarik sira-nia moris loron-loron iha uma, hanesan han ne'ebé saudavel no deskansa ne'ebé natoon.

Eventu ne’e partisipa mós husi reprezentante KOICA, ekipa téknika MJDAK, treinadór sira, no inan-aman husi atleta foun sira.

#MídiaMJDAK