DÍLI, 23 Fevereiru 2026 — Ministériu Juventude, Desportu, Arte no Kultura (MJDAK), liuhosi Gabinete Inspesaun no Auditoria Interna, hahú workshop loron tolu kona-ba Direitu no Regulamentu Administrativu, ho objetivu atu reforsa kapasidade funsionáriu públiku no parseiru sira kona-ba aplikasaun lei no prosedimentu administrasaun públika.

Atividade ne’e fó plataforma ba funsionáriu no parseiru sira atu fahe koñesimentu no esperiénsia kona-ba regulamentu administrativu, transparénsia no responsabilizasaun iha jestaun públika.

Workshop ne’e loke husi Xefe Gabinete MJDAK, Sr. Egas Barros Guterres Godinho, ne’ebé reprezenta Ministru. Iha ninia intervensaun, nia subliña katak integridade iha servisu públiku tenke implementa kontinua, husi dadeer to’o lorokraik, ho baze forte iha lei no regulamentu sira atu garante dezenvolvimentu nasionál ne’ebé sustentável.

Durante workshop, partisipante sira diskute pontu estratéjiku balun, inklui:

·       Ezekusaun OJE 2026: Oinsá jere no utiliza orsamentu ho transparénsia tuir Dekretu-Lei foun sira.

·       Prevensaun Korupsaun: Komprensaun kle’an kona-ba Lei n.º 7/2020 atu prevene iregularidade no má-jestaun.

·       Seguransa Sosiál: Aprezentasaun husi Instituto Nasionál Seguransa Sosiál (INSS) kona-ba protesaun direitu traballadór sira iha vida tomak.

·       Aprovizionamentu: Orientasaun kona-ba regra foun ba kontratu públiku no mekanizmu doasaun ba federasaun sira.

Aleinde ne’e, workshop ne’e mós foka ba orientasaun ba parseiru sira, liuliu federasaun desportiva no organizasaun juventude, atu ezekuta fundu Governu ho responsabilidade aas no tuir prosedimentu legal, hodi evita falla administrativu iha dokumentasaun no implementasaun programa sira.

Partisipa iha atividade ne’e mak dirigente sira, kargu xefia, funsionáriu kazuál, no reprezentante husi organizasaun juventude no federasaun desportiva oioin.

Atividade ida-ne’e reflete komitmentu MJDAK atu fortalece governasaun di’ak, transparénsia no prestasaun servisu públiku ne’ebé efisiente ba povu.

#MídiaMJDAK