DÍLI, 28 JANEIRU 2026 (MJDAK) – Ministériu Juventude, Desportu, Arte no Kultura (MJDAK) simu fila fali ho ksolok boot delegasaun atleta paralimpiku Timor-Leste nian, ne’ebé foin fila husi kompetisun 13th ASEAN Para Games iha Thailandia.

Serimónia simu nian ne’e hala’o iha Salaun Ema ho Defisiénsia (EhD), MJDAK, Díli, kinta-feira ne’e. Iha serimónia ne’e, marka prezensa Xefe Gabinete Sua Eselénsia Ministru nian, Sr. Egas Baros Guterres Godinho, Diretora-Jerál Servisu Korporativu, Sra. Adalziza M. R Ferreira, Diretor-Jerál Desportu, Sr. João M. Rodrigues, no Diretór Nasionál Desportu Federadu, Sr. Oscar Dias Quintas.

Rezultadu ne’ebé Orgullu

Maske hasoru kompetisaun ne'ebé maka'as, atleta sira konsege hatudu prestasaun ne'ebé di'ak tebes hodi konkista medalla hamutuk lima (5) ba rai doben Timor-Leste. Iha modalidade hamutuk lima ne’ebé partisipa, rezultadu mak hanesan tuir mai:

Modalidade Atletizmu :

Teófilo Freitas : Konkista medalla Oru rua (2) iha kategori 400 metru no 1.500 metru.

Joãozinho Fernandes Araujo :  Konkista medalla Oru ida (1) iha kategoria 5.000 metru

Romerio de Jesus: Konkista medalla Prata (osan-mutin) ida (1) iha kategoria 5.000 metru

Modalidade Ténis de Meza:

Abelita Borges: Oferese medalla Bronze (osan-metan) ida (1).

Husi totál atleta 23 ne’ebé desloka ba Thailandia, na’in 20 mak kompete ho máximu, ne’ebé lori orgullu boot ba nasaun.

Suporte Governu no Povu

Reprezentante Komité Paralimpiku Nasionál Timor-Leste (CPNTL) hato’o agradesimentu wain ba Governu, liuhusi MJDAK, ne’ebé fó ona suporta finanseiru no morál. "Agradese mós ba povu Timor laran tomak tanba imi-nia suporta no orasaun mak ita bele konkista medalla lima ne’e mai ita-nia rai," dehan reprezentante CPNTL.

Iha fatin hanesan, Diretór-Jerál Desportu, Sr. João M. Rodrigues, subliña katak koperasaun di’ak entre CPNTL, MJDAK, no federasaun sira mak sai xave ba susesu ne’e. Nia mós agradese ba Aman Maromak tanba delegasaun ho totál ema na’in 38 ne’e bele fila mai ho kompletu no saudavel.

Konseitu prémiu ba atleta sira ne'ebé manan medalla sei sai hanesan rekoñesimentu ba sira-nia dedikasaun hodi foti aas bandeira RDTL iha nível internasionál.

#MídiaMJDAK