BALIBÓ, BOBONARU, 16 Outubru 2025 – Timor-Leste komemora ohin aniversáriu asasinatu Balibó Five nian ba dala-50 no selebrasaun Loron Nasionál Liberdade Imprensa iha serimónia solene ne'ebé hala'o iha Balibó, Munisípiu Bobonaru. Iha eventu ne'e, Koordenadora Gabinete Komunikasaun no Informasaun MJDAK, Sra. Aida de Jesus Soares mós partisipa hodi reprezenta Ministru Juventude, Desportu, Arte no Kultura.

Sua Exelénsia Ministru Prezidénsia Konsellu Ministrus, Agio Pereira, reprezenta Primeiru-Ministru, Prezide serimónia ne'e, ne'ebé hala'o ho kolaborasaun entre Governu Timor-Leste, Konsellu Imprensa, no Fundasaun Balibó House Trust.

Mensajen Forte ba Lia-Loos no Memória

Iha ninia diskursu, Ministru Agio Pereira hanoin hikas jornalista Austrálianu na’in-lima—Greg Shackleton, Tony Stewart, Brian Peters, Malcolm Rennie no Gary Cunningham—ne’ebé mate iha Balibó iha 1975, no Roger East ne'ebé hetan ezekusaun semana balun liutiha iha Dili.

Ministru subliña katak sakrifísiu sira-nian kontinua sai hanesan kanek iha povu nia hanoin:

"Tinan limanulu liubá, jornalista joven na'in-lima iha Balibó, no ida iha Dili, hamriik entre silénsiu no mundu. Sira hili lia-loos no selu ho sira-nia vida. Ohin, ita hanoin hikas sira la'ós hanesan figura sira ne'ebé dook, maibé hanesan fó-hanoin ba ita-nia responsabilidade - ita tenke ko'alia, ezije, no foti asaun."

Ministru Agio Pereira afirma katak "Balibó Five" no Roger East nia mate "la'ós de'it nota rodapé ne’ebé dook husi istória", maibé sira-nia legadu labele haketak hosi istória luta ba independénsia Timor-Leste nian.

Programa Kultural no Rekonsiliasaun

Selebrasaun ne'e, ne'ebé hala'o durante semana tomak, inklui atividade oioin hodi fó onra ba vítima sira no promove Liberdade Imprensa: Serimónia benvindu tradisionál ; Misa iha memória ba vítima sira, prezide husi Bispu Maliana; Entrega prémiu jornalizmu anuál husi Konsellu Imprensa no Fundasaun Balibó House Trust; Lansamentu ba Rádiu Komunidade Fronteira Balibó 5; Semináriu ho títulu: “Reflesaun Nasionál kona-ba Papél Mídia nian iha Rezisténsia no iha Faze Dezenvolvimentu Nasionál”.

Serimónia ne’e halibur Prezidente Konsellu Imprensa, António Cesar Mali, Prezidente Autoridade Munisípiu Bobonaru, Paulo Moniz Maia, Embaixadora Nova Zelándia no Austrália nian, reprentante korpu diplomátiku, jornalista, família vítima, no membru komunidade.

Ministru Agio Pereira hakotu apelu ba "renovasaun: memória, kompromisu no determinasaun atu fó onra ba sira ne'ebé mate, hodi garante katak laiha lian ba lia-loos ne'ebé maka nonook fali."

#MídiaMJDAK