DILI, 15 Agostu 2025 – Ministériu Juventude, Desportu, Arte no Kultura (MJDAK) liuhosi Diresaun Nasionál Dezenvolvimentu Juventude (DNDJ), ohin hala'o ona entrevista finál ba kandidatu sira ba programa prestijiozu Programa Ró ba Foin-sa'e sira ba Sudeste Aziátiku no Japaun (SSEAYP – Ship for Southeast Asian and Japanese Youth Program) ba tinan 2026.

Husi aplikante hamutuk 52, kandidatu na'in-25 mak tuir entrevista finál ne'e iha resintu DNDJ.

Tuir Diretór DNDJ, Sr. Firmino Dias Quintas, tinan ne'e MJDAK sei hili joven na'in-6 (feto 3, mane 3) atu reprezenta Timor-Leste iha Japaun no hasoru joven sira husi nasaun Sudeste Aziátiku no Japaun.

Diretór Firmino Dias Quintas realsa katak Programa SSEAYP ne'e hanesan oportunidade furak ida ba ita-nia joven sira atu partilla Timor-Leste nia istória, kultura, no arte. Iha tempu hanesan, sira mós bele aprende kona-ba kooperasaun, lideransa, no kultura husi nasaun seluk.

Rezultadu finál husi prosesu selesaun ne'e sei fó sai ofisiálmente iha semana oin. MJDAK komprometidu atu garante transparénsia iha prosesu selesaun ne'e.

#MídiaMJDAK