DILI, 18 Marsu 2026 – Sekretáriu Estadu ba Arte no Kultura (SEAK), Sua Exelénsia Jorge Soares Cristovão, simu vizita kortezia husi Vise-Xefe Misaun Embaixada Áustria iha Jakarta, Sr. Michael Wislocki, hodi diskute hametin kooperasaun bilaterál entre Timor-Leste no Áustria, foka liuliu ba dezenvolvimentu arte no preservasaun kultura.

Iha sorumutu ne’ebé hala’o iha Gabinete SEAK, Dili, parte rua ne’e kobre asuntu fundamentál sira ne’ebé bele loke dalan ba interkámbiu kulturál no kapasitasaun ba artista timoroan sira. SEAK Jorge Soares Cristovão esklarese katak Timor-Leste iha potensiál boot iha área arte, maibé presiza parseiru estratéjiku hanesan Áustria—ne’ebé koñesidu iha mundu nu’udar sentru arte nian—hodi ajuda dezenvolve talentu lokál sira.

"Vizita ida-ne'e hanesan pasu importante hodi identifika área kooperasaun ne'ebé bele lori benefísiu ba nasaun rua. Ita hakarak aprende husi Áustria oinsá sira jere no promove sira-nia patrimóniu kulturál ba mundu," dehan Sekretáriu Estadu SEAK.

Iha fatin hanesan, Sr. Michael Wislocki manifesta interese boot husi Governu Áustria nian hodi apoia Timor-Leste, liuliu liuhusi programa hirak ne’ebé bele hametin identidade kulturál no promove kreatividade foin-sa’e sira nian.

Akompaña Sua Exelénsia SEAK iha sorumutu ne'e mak Diretór Jerál SEAK, Sr. Gil Paulino dos Santos Oliveira, ne’ebé sei kordena kestaun tékniku sira hodi transforma diskusaun ne'e ba planu asaun konkreta iha tempu oin mai.

#MídiaMJDAK