DILI, 23 Outubru 2025 – Ministériu Juventude, Desportu, Arte no Kultura (MJDAK), hamutuk ho parseru dezenvolvimentu Korea International Cooperation Agency (KOICA), ohin partisipa no realiza Fórum Partilla Susesu Projetu KOICA kona-ba Dezenvolvimentu Desportu ba Labarik.

Fórum ne'e hala’o iha Otél Novo Turismo, Dili, no envolve entidade sira hanesan Federasaun Futebol Timor-Leste (FFTL), Project Management Committee (PMC), Korea Overseas Development and Consulting (KODAC), no YMCA.

Partisipasaun ativa husi MJDAK mai husi Diretór-Jerál Desportu, Sr. João M. Rodrigues, no Diretora-Jerál Servisu Korporativu, Sra. Isabel Adalziza F. Rodrigues Ferreira. Partisipa mós Ofisiál Asaun Projetu, Hyojeong Kim, no Manajer Performance, Junyoung Koh (KOICA), inklui Xefe Suku sira no parte relevante seluk.

KOICA nia Kontribuisaun no Koperasaun Komunidade

Diretór-Jerál Desportu MJDAK, Sr. João M. Rodrigues, subliña prosesu kolaborasaun ne'ebé di'ak entre Timor-Leste no KOICA.

"Prosesu implementasaun projetu husi KOICA hahú husi tinan 2018 ho aprosimasaun, no felizmente iha 2022 ita konsege realiza kontrusaun ba kampu futeból haat (4) mak hanesan Kampu Becora, Bintan/Bidau, Kampu Alor, no Kampu Comoro."

DJ João realsa katak KOICA nia kontribuisaun la'ós de'it iha konstrusaun fasilidade, maibé mós iha kualidade jestaun, organizasaun, no atividade iha kampu sira. Nia husu ba Xefe Suku sira, UNTL, no Asosiasaun Futebol sira atu kontinua servisu hamutuk hodi garante sustentabilidade ba atividade sira ne’e.

Mudansa no Impaktu Sosiál

Manajer Performance KOICA, Sr. Kiwook Ha, realsa objetivu prinsipál husi fórum ne'e:

"Objetivu husi fórum ida ohin ne’e maka bazikamente fahe realizasaun no rezultadu sira husi projetu ida-ne’e. Ne’e la’ós de'it kona-ba númeru eventu ka partisipante, maibé kona-ba signifikadu mudansa lolos iha partisipante foinsa’e sira no treinadór sira."

Sr. Kiwook Ha hatutan katak MJDAK, treinadór, no membru komunidade sira tenke hamutuk atu habelar siénsia di'ak ida-ne'e ba ema barak, nune'e efeitu bele kontinua, maski projetu KOICA remata ona. Nia dehan, dezenvolvimentu desportu ne’e tenke enkorpora valór kona-ba igualdade jéneru no direitu labarik nian iha servisu.

Partisipasaun husi Diretór no Diretora-Jerál hatudu katak Governu iha kompromisu forte atu garante dezenvolvimentu desportu ne'ebé sustentável no kualidade, hodi fó benefísiu ba labarik no juventude Timoroan.

#MídiaMJDAK