PANTE MAKASAR, 05 Setembru 2026, GKI---Klubu Futebola sanulu resin ualu (18) iha Munisipiu Oekusi, kompete jogus hodi hadau malu Taxa Rotativa Xanana CUP 2026, iha Kapital Pante Makasar, Oekusi. Klubu Futebola 18 ne’e, mai husi Suku 18 hodi reprezenta postu hat (4) iha area Munisipiu Oekusi nian.

Ministru Juventude Desportu Arte no Kultura (MJDAK), Nelyo Isaac  Sarmento (NIS), ofisialmente loke (abertura)  jogus Xanana Cup 2026  Kampu Futebola Bene Fune, Oe-cusse Ambeno, Sabadu (05/11).

 NIS, iha diskursu abertura jogus Taxa Xanana CUP 2026 alerta,  Iha fulan Novembru tinan ida ne’e, MJDAK sei realiza jogus Festival Nasional Desportu (FND) iha Kapital Dili, ne’ebe sei kompete ekipa modalidades desportu husi munisipiu 14. 

Tanba ne’e, parte MJDAK mos distribui ona lista modalidade ba president autoridade munisipiu sira atu priense ba modalidade sira ne’ebe atu tuir festival nasional desportu (FND).

“Hau sente Oe-Cusse ba modalidade futebol ne’e hola parte duni, nune’e mos konaba modalidade voleybola ne’e Oe-Cusse halo Dili sira hakfodak no halo nusa mak Oe-Cusse famozu ho modalidade Voleybola ba feto no mane, seidauk tan ba boxe, maratona, taekwondo, karate-do, ho modalidade sira seluk. Delegasaun husi 12 munisipiu sei konsentra hotu iha Dili hodi tuir kompetisaun ba FND nian iha Dili,” NIS informa tan.

Oportunidade ba Xanana Cup 2026,  atu fo selesaun ba jogador sira atu reprezenta ida-ida nia munisipiu, espesialmente RAEOA ba nasional.

NIS admira ho  Oe-Cusse oan sira nia unidade no fraternidade ida mak bainhira Oe-cusse oan sira joga maka atividade negosiu ba faan pentolan hot-hotu taka, hahu husi labarik kiik, ferik, katuas no joven ba hotu,  no  fo apoiu sira nia klubu ne’ebe joga, ida ne’e hau admira.

Ida ne’e, orgullu ida ba atoni oan sira no ita laos makas iha Oe-cusse, mais ita makas to’o nasional, tenke uza oportunidade ida ne’e atu nunee naran Oe-Cusse boot iha fatin hotu-hotu.

Tinan oin, NIS promote, bele realiza ba modalidade futebol, feto mane, basketbola feto mane, voleybola feto mane ba  kompetisaun  Xanana Cup ne’e, atu hatete deit ba ita boot sirta ne’e, liu-liu atoni oan sira katak imi nia estrada kaber los, pelumenus realize netik marathon, tamba marathon ne’e bele kura ba desportu hotu-hotu iha atletizmu ne’e, halai, haksoit, silu a’an ba mai, ida ne’e hola parte hotu iha atletismu ne’e.

Tanba ne’e, NIS husu ba  ba foinsae  estudante sira, iha  eskola maka pratika atletismu ne’e bebeik imi sei hetan atletas ne’e diak iha imi nia eskola rasik hodi prepara   jogador,  nune’e bele ba kompete iha nasional liu-liu ba modalidade futebol, voleibola, basketbola no modalidade sira seluk, ita mos la espera katak FND ne’e bele hamosu Oe-Cusse oan ida atu bele tuir kompetisaun internasional hanesan ASEAN Games, SEA Games to’o Olimpiade, ita la espera bele mosu hanesan ne’e.

Iha desportu laiha inimigu, grupu ka koor, tanba desportu ne’e atividade ida ne’ebe atu hametin fraternidade, hametin amizade ho buat ida maka Sportivu. Aliende ne’e mos iha desportu ne’e iha manan no lakon, siginifika ida-ida autodefeza nia klubu, atu nune’e ida tenke sai kampiaun iha jogu refere.

Tuir NIS, atividades desportu ne’e la hamosu rasa, kulit,  mais desportu ne’e halibur malu hodi anima ba komunidade sira, atu nune’e bele hamenus konflitu no sira seluk ne’ebe ho hanoin negativu nian, tamba desportu ne’e atu kompete ho fair play.

Aliende ne’e Prezidente RAEOA Regio Salu konsidera kompetisaun jogus futebola  Xanana Cup 2026,   importante tebes, atu nune’e bele hamosu fini foun atleta sira liu-liu ba modalidade futebol nian.

Tanba, tuir Regio, tempu besik ona atu hahu FND iha Dili, ho ida ne’e mak liu husi Xanana Cup ne’e hanesan faze preparasaun ida, atu nune’e bele prepara jogador foun hodi nune’e bele partisipa kampionatu nasional desportu nian iha Dili, nafatin husi MJDAk nia apoiu atu nune’e Xanana Cup ne’e kontinua nafatin.

Partisipa ba Xanana Cup ne’e mak Deputadu Francisco Taek, Prezidente RAEOA, Presidente Autoridade Protesaun Civil (APC), Xefi Gabinete MJDAK, Komandante F-FDTL husi Komponente Terrestre no Komponente Naval-Fuzileiru, Komandante PNTL RAEOA nomos autoridade lokal husi suku 18 nian ho komunidade sira tomak. #mediamjdak#