DILI, 2 Outubru 2025 – Prezidente Akadémia Taekwondo Loriko, Helmia Binti Ahmad Alkatiri, hamutuk ho ekipa, hato’o agradese wa’in ba Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hafoin hetan susesu boot hodi konkista medalla 9 iha eventu TNI CUP Jakarta, Indonézia.

Sorumutu atu hato’o agradesimentu ne’e hala’o iha Salaun Magna MJDAK, Lecidere, Díli.

Ministru Nelyo Sarmento Destaka Esperiénsia no Mentalidade

Tuir Ministru Nelyo Isaac Sarmento, ida ne’e hanesan pasu importante ida ba Dozan Loriko atu aprende hodi dezenvolve di’ak liután mentalidade atleta sira-nian liuhusi esperiénsia foun atu bele kompete iha nível internasionál.

“Parabéns ba imi husi Dozan Loriko. Ida ne’e hanesan pasu ida atu aprende tan hodi konsisten treinu hodi dezenvolve liután imi-nia mentalidade. Tanba ita manán buat rua: esperiénsia foun husi eventu sira no mentalidade atu kompete iha nível internasionál,” dehan Ministru Nelyo Isaac Sarmento.

Nia husu ba atleta sira atu fó sira-nia tempu barak liu ba treinu hodi bele hetan prestasaun atu hamorin nasaun nia naran. Ministru Nelyo Isaac mós espresa ninia dezeju atu iha futuru, Dozan Loriko bele oferese medalla mós iha modalidade Boxe ba Timor-Leste.

Loriko Agradese Apoiu Governu nian

Prezidente Dozan Loriko, Helmia Binti Ahmad Alkatiri, esplika katak Akadémia Taekwondo Loriko agradese wa’in tebes ba apoiu hosi Governu, liu husi MJDAK no Palásiu Prezidente, no sponsor sira seluk, ne’ebé fó sira-nia kontribuisaun hodi bá partisipa iha eventu Pan Lima TNI CUP Jakarta, Indonézia.

Dozan Loriko lori atleta 19 pesoas no fila ho rezultadu:

·       Osan-Mean: 6

·       Osan-Mutin (Prata): 1

·       Osan-Metan (Bronze): 2

      Total: 9 Medalla

Helmia Alkatiri espresa esperansa katak atleta seluk ne’ebé la konsege rekolla medalla sei kontinua prepara an atu iha tempu seluk bele oferese mós medalla ba rai doben Timor-Leste.

Partisipa iha atividade ne’e husi Xefe Gabinete MJDAK, Egas Barros Guterres Godinho, hamutuk ho Asesór sira, inklui Atleta 19 husi Akadémia Taekwondo Loriko no mós Treinadór.

#MídiaMJDAK