DÍLI, 17 ABRIL 2026 (MEDIA MJDAK) – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, hala’o sorumutu ho reprezentante Banda Alkatraz no Event Organizer DoubleX, hodi koordena misaun promosaun kulturál ne’ebé sei hala’o iha rai-Europa.

Sorumutu ne’ebé hala’o iha Sala Magna MJDAK, Lecidere, Dili, iha objetivu atu rona direta kalendáriu no preparasaun ba viajen animasaun kulturál ne’ebé sei realiza iha sidade Coimbra (Portugál), Dungannon (Irlándia Norte), no Oxford (Inglaterra).

Iha biban ne’e, Ministru Nelyo Isaac Sarmento, ne’ebé akompaña husi Xefe Gabinete, Sr. Egas Barros Godinho, fó sai katak Governu liuhusi MJDAK prontu atu fó apoiu fundus ba inisiativa ne’e. Apoiu ne’e nu’udar forma rekoñesimentu ba papél múzika nian nu’udar meius diplomásia kulturál hodi hametin ligasaun ho komunidade timoroan iha diaspora.

"Imi-nia prezensa iha Europa la’ós de’it atu kanta, maibé atu lori ita-nia identidade kulturál. Governu fó apoiu ba viajen ne’e hodi anima ita-nia maluk timoroan sira iha selebrasaun Loron Restaurasaun Independénsia, 20 de Maiu. Imi ba anima sira, no sira sei agradese ba imi-nia kontribuisaun ne’e," dehan Ministru MJDAK.

Reprezentante Banda Alkatraz, Sr. Antonio Corte-Real de Oliveira, hato’o agradesimentu ba vizaun no apoiu husi Sua Exelénsia Ministru ne’ebé kontinua tau matan ba dezenvolvimentu talentu artístiku iha rai-laran. Nia subliña katak viajen ne’e sei sai oportunidade boot ida hodi fó koñese kbiit arte timoroan nian iha palku internasionál.

Tuir planu, ekipa Banda Alkatraz hamutuk ho Event Organizer DoubleX sei aranka ba Europa iha loron 26 Abrill 2026. Alende dezempeñu artístiku, misaun ne’e foka mós ba hametin unidade no kuda espíritu patriotizmu entre timoroan sira ne’ebé hela iha rai-li’ur.