DILI, 15 Maiu 2026 – Sekretariu Estadu ba Arte no Kultura (SEAK), S.E. Jorge Soares Cristóvão, hamutuk ho Embaixador Japaun iha Timor-Leste, S.E. Yamamoto Yasushi, ofisialmente ohin entrega premiu ba manán-na'in sira iha Kompetisaun Dezeñu Mitsubishi Asean Children's Enikki, iha Edifísiu SEAK, Praia dos Coqueiros, Dili.

Kompetisaun ne'e partisipa husi labarik ho idade tinan 6 to'o 12, ho total partisipante nain 8, kompostu husi feto nain 6 no mane nain 2. Programa ida-ne'e hetan suporta husi Nasaun Japaun liu husi Kompañia Mitsubishi Asean Children's, ho objetivu prinsipál atu promove edukasaun literásia no interkámbiu entre labarik sira iha kontinente Ázia, hodi komprende malu kultura entre nasaun sira.

Iha sorin seluk, kompetisaun ne'e mós motiva labarik sira atu sai kriativu liu husi imajinasaun no ilustrasaun loron-loron ne'ebé sira hetan iha sira-nia moris. Aleinde ne'e, atu hafanun labarik sira atu bele sai madura ho vizaun luan, liu husi atividade loron-loron no oinsá atu hadomi umanidade ida ba ida seluk, hodi motiva sira atu dezenvolve kriatividade husi sira-nia abilidade no experiénsia, nune'e bele inspira no transforma-an ba artista ka pintor iha futuru.

Iha biban ne'e, S.E. SEAK ho ekipa akompana mós S.E. Embaixador Japaun iha Timor-Leste hala'o vizita ba Expozisaun Tais ne'ebé lokaliza iha Edifísiu SEAK, hodi hatudu rikusoin kultura tais Timor-Leste nian ba delegasaun Japaun.

Serimónia entrega premiu ne'e partisipa husi Embaixador Japaun iha Timor-Leste ho delegasaun, diretóres no kargu xefia sira husi MJDAK no SEAK, Diretor Ezekutivu Arte Moris, família husi manán-na'in kompetisaun, no funsionáriu SEAK, inklui konvidadu importante sira.

SEAK reafirma kompromisu atu kontinua promove arte no kultura iha Timor-Leste, liu husi programa ne'ebé envolve labarik sira no juventude, hodi dezenvolve kriatividade no aprende kultura nasaun seluk liu husi interkámbiu kultural.

#MediaMjdak