BAUCAU, 28 MAIU 2026 – Sentru Juventude Munisípiu Baucau (SJMB) kontinua fó kontribuisaun pozitivu ba dezenvolvimentu juventude iha rejiaun, ho atinjimentu impresionante durante trimestre dahuluk (Q1) no inísiu trimestre daruak (Q2) tinan 2026, ne'ebé envolve joven barak liu husi atividade formasaun no empoderamentu.

Gabinete Komunikasaun no Informasaun (GCI) MJDAK hala'o intervista ho jestor SJMB, Manuel De Carvalho Marques, hodi aprezenta dadus konkreitu kona-ba partisipasaun joven sira iha atividade ne'ebé realiza.

Iha Q1, SJMB envolve joven hamutuk 57, ho kompozisaun feto 38 no mane 19, liuhusi atividade tolu prinsipál: diskusaun foinsa'e (feto 7, mane 5); formasaun Youth for Life (feto 33, mane 5); no formasaun relasaun saudavel (feto 18, mane 9).

Ba Q2, SJMB kontinua ho atividade regulár ne'ebé involve joven hamutuk 185, ho atividade 5 ne'ebé atinji, inklui: Kursu Inglés basiku etapa I (feto 19, mane 6) no etapa II (feto 17, mane 3); Formasaun LSBE (feto 15, mane 7); Formasaun saudavel iha Eskola Sekundária Jeral Triloka Aubaka (feto 33, mane 21); Atividade internet saudavel iha eskola ne'ebé hanesan (feto 25, mane 39).

Kursu komputador ne'ebé hahu iha Fevereiru kontinua la'o no sei aumenta numeru partisipante Q1.

Jestor SJMB, Manuel De Carvalho Marques, hatete katak atividade sira la'ós de'it iha sentru, maibé mós alarga ba Postu Administrativu, Suku, no Aldeia. Nia destaka katak partisipasaun feto sempre liu mane, ne'ebé sai dezafiu atu buka solusaun hodi aumenta partisipasaun mane.

Planu ba oin, SJMB espera apoiu husi MJDAK no autoridade munisipál atu reforsa ezisténsia sentru, liuliu ba espansaun fatin formasaun nivel téknika, hodi prepara joven sira ba merkadu lokal no internasionál. Ho Timor-Leste tama iha ASEAN, joven sira tenke prepara ho mentalidade forte atu foti desizaun iha nivel lokal.

Jestor mós kontente tebes katak membru rua husi SJMB partisipa iha reuniaun konsultivu munisipál ba foti desizaun. Nia reafirma katak SJMB nu'udar ajente prinsipál ne'ebé foka ba juventude, no husu apoiu kontínuu husi MJDAK ba sentru juventude iha munisípiu hotu.

GCI MJDAK kontinua halo kobertura no publika atividade institusionál ho parseiru sira, hodi garante transparénsia no informasaun ba publiku.

#MediaMjdak