Dili, 28 Fevereiru 2026 - Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha final Tasa da  Liga 2026 ne’ebé realiza iha Estadio Munisipal Dili, nudar apoiu guvernu ba dezenvolvimentu futebol nasional.

Iha okaziaun ne’e, Ministru hato’o agradese ba Federasaun de Futebol de Timor-Leste (FFTL) tanba komesa ona revitalizasaun kompetisaun futebol iha rai-laran, ho Tasa da Liga nu’udar pasu inisial atu pepara liga nasional ne’ebé planeadu atu hahú iha fulan-Abril.

“Guvernu prontu apoiu dezenvolvimentu futebol nasional. importante katak FFTL ho liga sira organiza ho di’ak, nune’e kompetisaun bele la’o ho kualidae no kontinuidade,”dehan Ministru.

nia mós destaka katak prezensa adeptu sira iha estadio hatudu katak futebol nafatin iha fatin importante iha sosiedade Timor-Leste nian, no bele sai motivasaun boot ba atleta sira atu dezenvolve prestasaun iha futuru.

Iha final ne’e, klubu Emanuel FC sai kampiaun Tasa da Liga 2026 hafoin halakon Karketu Dili FC ho rezultadu 1-0. Golu vitoria marka husi jogador Vincer Kojo Nortey iha tempu akresidu (45+4).

atividade ne’e hetan partisipasaun husi entidade importante sira, inklui Sekretariu Estadu Arte no Kultura, lideransa FFTL, reprezentante klubu Primeira Devizaun sira, no adeptus futebol barak husi kapitál.

MJDAK reafirma ninia komitmentu atu kontinua servisu hamutuk ho federasaun desportiva sira hodi promove kompetisaun regular, identifika atleta potensial, no hasa’e nivel desportu nasional iha arena rejional no internasional.

#MídiaMJDAK