DILI, 30 Abríl 2026 – Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha sorumutu ordináriu Konsellu Ministru ne’ebé hala’o iha Palásiu Governu, Dili. Iha sorumutu ne’e, Governu foti desizaun estratéjiku balun ne’ebé foka ba dezenvolvimentu infraestrutura agríkola, setór enerjétiku, no hametin kooperasaun bilaterál iha área saúde.

Tuir rezultadu sorumutu, Konsellu Ministru aprova ona pontu importante tolu ne’ebé sei fó impaktu ba dezenvolvimentu nasionál:

1. Investimentu ba Irrigasaun Laueli

Governu delibera hodi autoriza despeza ho montante USD millaun 10,25 ba konstrusaun projetu irrigasaun Laueli, iha Munisípiu Ermera. Projetu ne’ebé aprezenta hosi Ministru Agrikultura, Pekuária, Peskas no Florestas, Marcos da Cruz, ho objetivu atu hametin seguransa ai-han no apoia fali setór produsaun rai-laran.

2. Fortalesimentu Setór Petróleu no Enerjétiku

Ho proposta hosi Ministru Petróleu no Rekursus Minerais, Francisco da Costa Monteiro, Governu autoriza:

Subvensaun ba TIMOR GAP: Aprovasaun orsamentu USD millaun 14 ba tinan 2026 hodi dezenvolve polítika no prátika di’ak iha indústria, hodi garante partisipasaun másima Timoroan sira-nian iha setór ne’e.

Kooperasaun ho Brunei Darussalam: Governu prepara ona hodi asina Memorandu Entendimentu (MoU) ho Brunei Darussalam iha semana oin. Kooperasaun ne’e foka ba fahe koñesimentu, kapasidade téknika, no promosaun investimentu iha área petróleu no gás.

3. Kooperasaun Bilaterál iha Área Saúde

Ikusliu, Konsellu Ministru mós rona aprezentasaun hosi Vise-Ministru ba Fortalesimentu Institusionál Saúde, José dos Reis Magno, kona-ba kooperasaun foun ho Governu Brunei Darussalam iha área saúde.

Akordu ne’e sei foka ba: Prevensaun no kontrolu moras; Dezenvolvimentu rekursus umanus (espesialista sira). No Reforsu infraestrutura ba ospitál sira iha Timor-Leste.

Prezensa Ministru MJDAK iha sorumutu ne'e hatudu kompromisu Governu nian hodi servisu integradu (inter-ministeriál) hodi atinji meta sira iha Planu Estratéjiku Dezenvolvimentu Nasionál.