DILI, 30 Abríl 2026 – Ministériu Juventude, Desportu, Arte no Kultura (MJDAK) hamutuk ho Ministériu Edukasaun (ME) no Ministériu Negósiu Estranjeiru no Kooperasaun (MNEC), foka liu ba sinkronizasaun progresu servisu hodi nune'e bele simu ho kualidade delegasaun Ministru Kultura husi CPLP iha loron 4 no 5 Maiu oinmai.

Iha reuniun ne’ebé hala’o iha Salaun Magna MJDAK, Lecidere, Diretór Jerál SEAK, Gil Paulino de Oliveira, ne’ebé reprezenta Sekretáriu Estadu, enfatiza katak koordenasaun ne'e importante tebes hodi asegura katak setór hotu la'o tuir planu ne'ebé fiksa ona.

Ajuste Tékniku no Integrasaun Progresu

Enkontru ne'e la'ós ona ko'alia kona-ba planu jerál, maibé foka liu ba integrasaun servisu husi liña ministériu sira ne'ebé involve hodi evita fallansu tékniku iha terrenu.

“Ita presiza sinkroniza pontus importante sira, liuliu haree ba progresu servisu husi parte Ministériu Edukasaun, MNEC, inklui mós husi MJDAK. Iha asuntu balun ne’ebé presiza tebes ita hadi’a hamutuk ho lalais,” dehan DJ Gil Paulino.

Koordenasaun ba Delegasaun na'in 25

Sinkronizasaun ne'e mós inklui preparasaun lojístika no protokolu ba delegasaun hamutuk ema na’in 25 ne’ebé kompostu husi Ministru sira no reprezentante husi Komunidade Paízes Lian Portugés (CPLP).

Partisipa iha atividade ne’e, Vise-Prezidente Institutu Nasional Formasaun Dosente no Profisional Edukasaun (INFORDEPE) ba Assuntu Formasaun Akademika, Maria Madalena Lopes, Diretór CPLP-MNEC, Joaquim Fernandes, hamutuk ho kargu xefia no ekipa téknika sira husi instituisaun tolu ne'e.