DÍLI, 26 Jullu 2025 – Sua Exelénsia Primeiru-Ministru Repúblika Demokrátika Timor-Leste (RDTL), Kay Rala Xanana Gusmão, ohin hala'o serimónia enseramentu ofisiál ba XII Jogos Desportivos CPLP 2025. Timor-Leste sai nu'udar Uma-Na'in ba eventu internasionál ne'e. Atividade ksolok ida-ne'e akontese iha Estádiu Munisipál Díli, hodi marka finál husi semana ida ne'ebé nakonu ho espíritu amizade no kompetisaun.

Desportu: Valór, Respeitu, no Tolerânsia

Iha ninia diskursu sentrál, PM Xanana Gusmão hato'o mensajen forte ida, subliña katak desportu ne'e hanesan "Eskola ba Paz no Tolerânsia ba ema hotu."

"Desportu hanorin ita kona-ba valór, respeitu, no parseria," PM hateten. "Manán ka lakon la'ós objetivu fundamentál, maibé desportu hanesan fatin ba joven sira atu espresa sira-nia talentu no promove espíritu uniaun no solidariedade."

PM hato'o agradesimentu no orgullu boot ba ekipa tomak – diplomata sira, voluntáriu sira, seguransa, no saúde – ne'ebé kontribui hodi halo Jogos CPLP ne'e susesu.

Timor-Leste Nia Susesu nu'udar Uma-Na'in

PM Xanana Gusmão mós realsa katak hanesan dahuluk ba Timor-Leste atu organiza Jogos CPLP nian, fó oportunidade di'ak ba nasaun atu aprende. Nia husu ba joven sira atu kontinua pratika desportu hodi hametin unidade ne'ebé ita hakarak atinje.

Kontijente sira husi Angola, Cabo Verde, Portugál, Moçambique, São Tomé e Príncipe, hamutuk ho uma-na'in Timor-Leste, hatudu duni solidariedade no fraternidade durante Jogos CPLP ne'ebé la'o ho hakmatek no susesu.

Serimónia enseramentu ne'e hetan partisipasaun másimu husi figura importante sira, inklui S. Exa. Prezidente Repúblika (PR), Dr. José Ramos-Horta, Vise Primeiru-Ministru Francisco Kalbuadi Lay, Ministru sira husi país CPLP hanesan Portugál, Angola, São Tomé e Príncipe, no alta entidade sira husi rai laran.

#MídiaMJDAK