DILI, 20 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Sua Exelénsia Sekretáriu Estadu Arte no Kultura (SEAK), Jorge Soares Cristovão, ohin lidera reuniaun koordenasaun ho Diretór-Jerál no Diretór Nasionál sira husi MJDAK no SEAK. Reuniaun ne'e hala'o iha Salaun Magna MJDAK, Lecidere, hodi finaliza preparasaun ba aprezentasaun iha Parlamentu Nasionál.

Sumáriu Ezekusaun OJE 2025

Objetivu sentrál husi reuniaun ne'e mak atu diskute sumáriu ezekusaun Orsamentu Jerál Estadu (OJE) 2025 nian. Diretór Nasionál relevante sira aprezenta relatóriu detalla kona-ba programa ne'ebé ezekuta ona tuir kategoria orsamentu nian. Koordenasaun ne'e garante katak relatóriu ezekusaun MJDAK-SEAK nian reflete duni progresu iha terrenu.

Agenda Prinsipál: Audiénsia ho Komisaun G PN

Tuir rezultadu husi reuniaun, Ekipa Tékika MJDAK-SEAK sei marka audiénsia importante ida ho Komisaun G Parlamentu Nasionál (ne'ebé trata asuntu Edukasaun, Juventude, Kultura, no Sidadania). Enkontru ne'e sei hala'o iha Salaun Enkontru Komisaun G Parlamentu Nasionál iha loron 23 Outubru 2025.

Objetivu prinsípál husi audiénsia ne'e maka: Aprezenta Proposta OJE 2026: Diskute Proposta Orsamentu MJDAK nian ba Juventude, Desportu, Arte no Kultura nian ba tinan 2026. Atualiza Progresu: Atualiza Komisaun G kona-ba progresu ezekusaun orsamentu tinan 2025 nian.

Ministru Nelyo Isaac Sarmento no Sekretáriu Estadu Jorge Soares Cristovão nia kompromisu hodi koordena didi'ak ho Diretór sira hatudu responsabilidade Governu nian atu garante transparénsia ba Orsamentu Jerál Estadu no atu prepara-an ho di'ak ba debate OJE 2026 nian iha fulan-Novembru.

Reuniaun ne'e partisipa mós husi Xefe Gabinete MJDAK-SEAK, Asesór sira, Diretór-Jerál Servisu Korporativu, Diretór-Jerál Desportu, Prezidente KRAM, no Diretór-Jerál Arte no Kultura.

#MídiaMJDAK