OEKUSI, 24 Outubru 2026, GKI--Ministru Juventude, Desportu Arte no Kultura (MJDAK), Nelyo Isaac Sarmento akompaña husi Xefí Gabineti, Egas Baros Guterres Godinho, Prezidenti Autoridade Munisipal (PAM) Reziaun Administrativu Espesial Oecuse Ambeno (RAEOA),  Régio Servantes Romeia da Cruz Salu, Deputadu Firmino Teki no Deputadu Agio Perreira partisipa iha seremoni enseramentu Taxa Xanana Cup iha Reziaun Administrativu Espesial Oecuse Ambeno (RAEOA).

Atividade ne’e hala’o iha kampo futeból Baki, Suku Naimeco, Postu Administrativu Pante Macasar, Munisipiu RAEOA.

Ministru Juventude Desportu Arte no Kultura, Nelyo Isaac Sarmento hatete, jogus Taxa Xanana Cup ne’e,  Primeiru Ministru, Kayrala Xanana Gusmao oferese ba  povu  Atoni oan hodi  kria amizade ba malu ho partisipasaun joven sira.

La’os atu buka manan ka lakon de’it, Nelyo hatutan,  oinsá mak kria dame no páz entre suku sira atu iha hanoin ida de’it katak mesak timor oan no jogu ida ne’e sei akontese kada tinan iha RAEOA.

“Mensajen Primeiru Ministru nian ba Atoni oan sira katak tinan ida ne’e maske Primeiru Ministru nia prezensa laiha maibé tinan seluk sei mai ho atividade ne’ebé mak di’ak liutan tanba ne’e husu atoni oan sira tenki liu-liu joven sira atu kria amizade ba malu ho eventu jogu joven sira nia partisipasaun la’os atu buka manan ka lakon de’it maibé oinsá mak kria dame no páz entre suku sira atu iha hanoin ida de’it katak mesak timor oan tanba ida ne’e mak jogu Taxa Xanana Cup ne’e Primeiru Ministru oferese ba imi Atoni oan no jogu ida ne’e sei akontese kada tinan iha RAEOA,”  Nelyo Isaac haktuir.

Nelyo Isaac mós hato’o parabens ba iha ekipa Manan na’in Taxa Xanana Cup ne’ebé vensedór husi ekipa Naimeco ne’ebé kontra ekipa Suni Ufe iha enseramentu Taxa Rotativa Xanana Cup 2026.

Maske hahú husi inisiu kontra malu iha kampo laran maibé iha liur nafatin kria unidade ba malu atu oportunidade tuir mai ekipa Suni Ufe bele sai kampeaun  Taxa Xanana Cup. MJDAK konsidera, Atoni oan hadomi tebes desportu hahú husi ferik katuas labarik no joven sira.

Parisipasaun maximu husi komunidades ne’e,  hatudu simbolu unidade Atoni oan nian sai ezemplu ba fatin seluk ida ne’e mak mensajen importante husi Primeiru Ministru. Partisipa iha jogu enseramentu Taxa Xanana Cup entre ekipa Naimeco konta Suni Ufe.  #MédiaMjdak#