LAUTEM, 25 Outubru 2026, GKI--Sekretáriu Estadu Arte no Kultura (SEAK), Jorge Soares Cristovão ensera  Festival Kultura Fronteira Lautem (FKFL) no konsidera atividades kultural ne’e lao ho susesu. Jorge konsidera mos  festival fronteira ne’e laos deit eventu kultura maibe nudar instrumentu  hodi hametin relasaun bilateral, promove dialogu no haforsa kooperasaun entre komunidade sira area fronteira inklui fronteira tasi ho Propinsia Maluku, Indonesia.

Jorge hatete, atividade ne'e kontinua polítika ne'ebé hahu hafoin restaura independénsia. Tanba liu husi atividade kulturál, interkambiu no dialogu kulturál, bele hametin liu tán relasaun amizade no fraternidade entre populasaun sira iha área fronteira.

Timoroan sira ne'ebé hela iha territóriu Indonézia, kontinua iha ligasaun istória kulturál no lisan ho Timor-Leste. Maski territóriu no administrasaun diferente, kultura, lisan no identidade istória kontinua sai elementu importante ne'ebé liga hamutuk.

Tuir Jorge Cristovão,  durante tinan barak koalia fronteira rai de'it, agora mós fronteira tasi. Koalia kona-ba fronteira rai no mós fronteira tasi nian. Maluk sira husi Maluku Barat Daya, liuhusi ilha Kisar, hatudu interese atu partisipa ho delegasaun ema nain 30 resin.

Partisipasaun ne'e hatudu vontade atu hametin relasaun ho Timor-Leste iha futuru.

Antes ema barak preokupa Festival Fronteira sei kontinua iha Lautem ou lae, maski dezafiu, iha kompromisu atu kontinua promove atividade ida ne’e nafatin lao ba oin.

SEAK mos hato’o agradeseimentu ba PAM Lautem, APA Lautem, Xefi Suku Com hamutuk estrutura tomak, inan-aman, komunidade Com ne'ebé prepara ai-han no fasilita, autoridade lokál husi Propinsia Nusa Tenggara Timur (NTT) hanesan Malaka, Belu, Kefamenanu, Kupang no Propinsia Maluku Barat Daya, Indonesia.  Juventude sira ne'ebé halo aprezentasaun dansa kulturál.

Partisipasaun Juventude la'ós deit fo atrasaun ba eventu, mais hatudu juventude nia papél importante ba prosesu hametin relasaun entre komunidade sira iha área fronteira terestre no Maritima. #Mediamjdak#