DILI, 25 Jullu 2025 – Timor-Leste hatudu ninia prestasaun ne'ebé di'ak liu iha XII Jogos Desportivos da Komunidade ba País Lian Portugés (CPLP) 2025. Atleta Timoroan, Maricia Mota, konsege konkista Medalla Ouro (Gold Medal) ba modalidade Karaté-Do Feto iha jogu finál ne'ebé nakonu ho intensa.

Maricia Mota hakat ba finál hasoru adversáriu forte husi Portugál. Jogu ne’e la’o ho kompetitivu tebes, ne’ebé remata ho skor empata 2-2. Maski nune'e, Maricia hatudu ninia téknika no estratejia ne'ebé dominál iha minutu ikus, hodi asegura ninia vitória liuhusi desizaun husi árbitru (Hantei).

Sentidu Orgullu ba Nasaun

Hafoin konkista medalla ne'e, Maricia Mota espresa ninia sentimentu ho emosaun:

"Ha'u sente kontente no orgullu tebes tanba bele lori naran Timor-Leste nian. Medalla Ouro ne'e la'ós ba ha'u mesak, maibé ba povu Timor-Leste hotu," Maricia hatete.

Konkista Medalla Ouro ne'e hanesan susesu boot ida ba desportu Timor-Leste nian iha kompetisaun CPLP 2025, no fó inspirasaun ba atleta joven sira atu kontinua lori naran Timor-Leste nian iha kompetisaun internasionál.

#MídiaMJDAK