DÍLI, 23 Marsu 2026 – Sekretaria Estadu Arte no Kultura (SEAK), liuhusi Diresaun Jerál Arte no Kultura, realiza reuniaun teknika dahuluk hodi prepara Timor-Leste atu sai uma nain ba Reuniaun Ministru Kultura husi Comunidade dos Países de Língua Portuguesa (CPLP) tinan 2026.

Reuniaun ne’e realiza iha Salaun Magna Ministériu Juventude, Desportu, Arte no Kultura (MJDAK), Lecidere, Díli, ho partisipasaun husi instituisaun relevante sira atu garante preparasaun ne’ebé koordenadu no efisiente.

Diretór Jerál Arte no Kultura, Gil Paulino dos Santos Oliveira, hato’o katak Reuniaun Ministru Kultura CPLP sei realiza iha loron 4 no 5 fulan Maiu 2026, no Timor-Leste mak sei simu responsabilidade nu’udar uma nain.

“Preparasaun tekniku hanesan reuniaun ohin importante tebes atu asegura organizasaun ne’ebé di’ak, inklui aspetu logistika, matéria reuniaun no mekanizmu koordenasaun entre instituisaun sira,” dehan Diretór Jerál.

Reuniaun teknika ne’e envolve instituisaun sira hanesan MJDAK, SEAK, Ministériu Negósius Estranjeirus no Kooperasaun (MNEK), Ministériu Interior (MI), no Polícia Nacional de Timor-Leste, atu forma komisaun organizadora ne’ebé bele halo preparasaun kompletu ba eventu ne’e.

Iha reuniaun ne’e, partisipante sira diskute mos kona-ba nesesidade atu prepara: Apoiu logistiku ba delegasaun sira, dokumentu no matéria reuniaun, servisu protokolu no imigrasaun no arranju seguransa durante realizasaun eventu

MNEK, liuhusi diresaun protokolu, sei lidera koordenasaun relasiona ho resepsaun no asisténsia ba delegasaun ofisiál sira, inklui ministru kultura husi nasaun membru CPLP. Enkuantu ne’e, PNTL sei responsavel ba aspetu seguransa durante estadia delegasaun sira iha Timor-Leste.

Nasaun membru CPLP ne’ebé sei partisipa iha reuniaun ne’e inklui Angola, Brasil, Cabo Verde, Moçambique, São Tomé e Príncipe, Portugal no Timor-Leste, enkuantu Guiné-Bissau no Guiné Equatorial sei kontinua iha faze koordenasaun ho MNEK.

Reuniaun teknika ne’e mos partisipa husi Diretora Jerál Protokolu MNEK, diretór sira husi SEAK inklui Diretur DNPLI no Diretur Nasional Patrimóniu Kultura, delegasaun Sekretariadu CPLP, unidade sira husi PNTL (Migrasaun no Tránzitu), no staf sira husi SEAK.

Ho realizasaun reuniaun ida-ne’e, Governu reafirma ninia kompromisu atu organiza eventu internasional ho padraun aas, hodi promove kultura no imajen Timor-Leste iha palku internasionál.

#MídiaMJDAK