DÍLI, 24 Fevereiru 2026 — Sua Excelénsia Ministru Juventude, Desportu, Arte no Kultura (MJDAC), Nelyo Isaac Sarmento, hamutuk ho Sua Excelénsia Sekretáriu Estadu Arte no Kultura (SEAK), Jorge Soares Cristóvão, partisipa iha Workshop Nasionál Dahuluk kona-ba Mekanizmu Koordenasaun Interministeriál ba Komunidade Sosio-Kulturál ASEAN (ASCC).

Workshop ne’e sai hanesan pasu estratéjiku hodi hametin koordenasaun entre ministériu no instituisaun sira iha ámbitu pilar sosio-kulturál ASEAN, atu asegura katak Timor-Leste kumpri ho efetivu roteiru integrasaun nudar membru plenu ASEAN.

Atividade ne’e lidera husi Sua Excelénsia Vise-Primeiru-Ministru no Ministru Koordenadór ba Asuntu Sosiál, Mariano Assanami Sabino, no foka ba área prioridade tolu, mak hanesan:

Efektiviza Koordenasaun Interministeriál: Hametin sinerjia no alinha pozisaun entre lina ministeriál sira iha pilar sosio-kulturál.

Implementasaun Roteiru Adezaun: Prepara instituisaun relevante sira atu kumpri obrigasaun no kompromisu nu’udar Estadu-Membru foun.

Vizaun ASEAN 2045: Aliña planu no polítika nasionál iha área edukasaun, protesaun sosiál no diversidade kulturál ho vizaun dezenvolvimentu rejionál.

Iha intervensaun sira, Ministru MJDAC no Sekretáriu Estadu Arte no Kultura reafirma katak setór juventude no kultura iha papel estratéjiku iha prosesu integrasaun rejionál, liuliu atu promove ligasaun entre povu (“people-to-people connectivity”) no hametin identidade no solidariedade rejionál.

Workshop ne’e konta ho partisipasaun husi ministériu no instituisaun relevante sira, inklui MSSI, MESSC, ME, MS, MI, KFP, APC, SEII, SEPC no SEPFOPE, hanesan parte husi esforsu Governu atu garante preparasaun ne’ebé koordinadu no integradu iha ámbitu ASCC.

Atividade ida-ne’e reflete komitmentu Governu atu hametin koordenasaun nasional no asegura partisipasaun ativa Timor-Leste iha Komunidade Sosio-Kulturál ASEAN.

#MídiaMJDAK