DILI, 28 MARSU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Sua Eminénsia Kardeal Dom Virgílio do Carmo da Silva, foti parte iha serimónia enseramentu "Tasa Paskoa" ne’ebé hala’o iha Kampu Bidau Lecidere, Dili.

Iha ninia diskursu, Ministru Nelyo Isaac fó rekoñesimentu ba inisiativa foin-sa'e sira nian no reafirma kometimentu Governu nian hodi kontinua apoia atividade foin-sa'e nian ne'ebé organiza ho di'ak.

"Governu prontu nafatin atu apoia imi-nia atividade, maibé imi tenke organiza ho di'ak no disiplina. Ida-ne'e importante atu imi-nia alin foin-sa'e sira bele banati-tuir imi-nia ain-fatin, tanba imi mak futuru ba ita-nia nasaun," dehan Ministru MJDAK.

Sua Exelénsia mós subliña katak eventu hanesan ne'e la'ós de'it kona-ba desportu, maibé mós kona-ba fó lisaun moris no kontinua istória "Tasa Paskoa" ne'ebé uluk hahú husi figuras boot hanesan Dom Carlos.

Iha fatin hanesan, Sua Eminénsia Kardeal Dom Virgílio do Carmo da Silva parabeniza juventude Bidau Lecidere ba sira-nia esforsu hodi hamoris fali espíritu Paskoa nian. Kardeal mós apresia ho progresu organizasaun ne'ebé tinan ida-ne'e la'o ho efisiénsia aas liu kompara ho tinan sira liubá.

"Ha'u haree foin-sa'e sira iha Bidau Lecidere kontinua kaer metin espíritu Juventude Katólika nian. Agradese ba inan-aman no apoiante hotu ne'ebé la para atu fó liman ba ita-nia foin-sa'e sira," tenik Kardeal Dom Virgílio.

Eventu ne’e remata ho ksolok no sai hanesan sasin ba unidade entre Governu, Igreja, no Komunidade hodi dudu foin-sa'e sira ba dalan ne'ebé pozitivu.

#MídiaMJDAK