Dili, 11 Maiu 2026 — Foinsa’e hamutuk ema na’in-15 partisipa iha formasaun tékniku “Time Chips Electronic” ne’ebé organiza husi Federasaun Timor-Leste Atletizmu (FTA) ho apoiu husi Ministériu Juventude, Desportu, Arte no Kultura (MJDAK), iha Salaun Formasaun Jináziu Desportu Dili (GDD).

Atividade ne’e loke oficialmente husi Diretór Jerál Desportu (DJD), Senhor David Tomas de Deus, akompaña husi Diretóra Nasionál Desportu Federadu (DNDF), Senhora Josefina Zeca Pinto, no Prezidenti Federasaun Timor-Leste Atletizmu (FTA), Senhor Afranio Xavier.

Iha ninia intervensaun, Diretór Jerál Desportu, David Tomas de Deus, hatete katak Timor-Leste presiza adapta ho dezenvolvimentu teknolójiku no evolusaun global ne’ebé kontinua muda sistema manual ba sistema eletróniku, liuliu iha área desportiva.

Nia esplika katak utilizasaun sistema “Time Chips Electronic” importante atu asegura prosesu krónometrázem ne’ebé lalais, loos no efisiente, liuliu iha realizasaun eventu desportivu boot sira, hodi minimiza erros ne’ebé durante ne’e akontese iha sistema manual.

“Ami agradese ba Federasaun Timor-Leste  Atletizmu tanba organiza formasaun ida ne’e ho di’ak. Timor-Leste hanesan nasaun ida tenke adapta ho dezenvolvimentu no evolusaun mundiál, ne’ebé agora muda husi sistema manual ba eletróniku. Tanba ne’e, Ministériu iha komitmentu atu kontinua fó apoiu ba federasaun sira hodi hasa’e kuñesimentu no kapasidade juventude sira liuhusi formasaun,” hatete Diretór Jerál Desportu.

Nia mós enkoraja partisipante sira, liuliu foinsa’e, atu uza oportunidade ne’e hodi aprende no dezenvolve kapasidade téknika, atu iha futuru bele kontribui iha organizasaun kompetisaun sira iha nível nasional no rejionál, inklui iha eventu ASEAN.

Formasaun ne’e realiza durante loron tolu no hetan apoiu orsamental husi MJDAK hamutuk dólar amerikanu rihun-hitu. Atividade ne’e organiza husi FTA no hetan partisipasaun ativu husi formandu sira durante programa formasaun.