DILI, 20 Abríl 2026 (GCI/MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala’o sorumutu urjente ho estrutura Federasaun Boxing Timor-Leste iha Salaun Magna MJDAK, Lecidere, Dili, segunda-feira ne’e.

Iha sorumutu ne’e, Governante ne’e hato’o preokupasaun maka’as kona-ba dezafiu interna ne’ebé federasaun enfrenta, ne’ebé fó impaktu negativu ba dezenvolvimentu modalidade Boxing no kapasidade atleta sira nian iha rai-laran.

Rezolusaun Konflitu ba Dezenvolvimentu

Ministru Nelyo Isaac Sarmento (NIS) salienta, Governu sei la tolera ema ruma sai vítima ba estagnasaun desportu tanba kestaun pesoál ka interna.

"Problema ne'ebé imi iha ne'e kestaun interna, maibé ha'u-nia preokupasaun mak imi hanesan hela de'it no Boxing la la'o ba oin. Ha'u ko'alia ona ba imi senior sira, oinsá mak imi fó netik buat ruma ba ita-nia boxista sira. Ho apoiu ofisiál ne'ebé Governu iha liuhusi MJDAK, ita tenke iha vizaun ida de'it hodi dezenvolve Boxing ba futuru," dehan Ministru NIS.

Agenda Kompetisaun 2026

Maski iha dezafiu interna, Governu kontinua hatudu kompromisu hodi dudu boxista sira-nia kualidade. Ba tinan 2026, MJDAK kria ona programa espesial ne’ebé foku ba kompetisaun: Kompetisaun Nasionál: Sei hala'o dala tolu (3) iha tinan ne'e nia laran. Kompetisaun Internasionál: Sei haruka atleta sira hodi kompete dala ida (1) iha rai-li'ur.

Ministru NIS ne’e husu ba federasaun atu uza oportunidade no orsamentu ne’ebé Governu fó ho responsabilidade, nune’e boxe bele fila hikas ba ninia "tempu gloria" hodi lori medalla ba Timor-Leste.