MALIANA, 29 Agostu 2026, GKI---Xefi Gabinete Ministeriu Juventude, Desportu, Arte no Kultura (MJDAK),  Egas Barros Guterres Godinho apela ba foinsae sira iha Suku Lahomea, Postu Maliana, Munisipiu Bobonaro hodi kontinua dezenvolve atividades desportu, banati tuir lider resistensia sira nia esperiensia organiza estratejia pulitika no funu ho diak no kapa’as.

Egas apela iha seremonia enseramentu jogus desportu, modalidade Bola Volly Feto no Mane, Halai Karon, Tata Berlindus no Hana Kalik, ne’ebe organiza husi Xefi Suku no foinsae Suku Lahomea. Atividades jogus desportu ne’e, hetan apoiu husi gabinete Ministru MJDAK.

“Imi tenke banati tuir lider sira nia ain fatin hodi organiza aktividade ho diak no kapas iha futuru oin mai, “ Egas husu ba ekipa desportivas sira iha Sede Suku Lahomea, Maliana. Aktidade ne'e partisipa husi aldeia sira ne'ebé pertense iha suku Lahomea.

Egas Barros Guterres Godinho, subline,  momentu importante nee itaboot sira marka istoria ida iha Suku Lahomea ho lideransa ida ne'ebé diak loos iha vontade ho amizade hakarak organiza eventu importante ne'e. Tanba, asuntu atividades desportu  liga ho juventude, desportu, arte no kultura entaun ministeriu iha papel hodi apoiu ho kbiit ne'ebé iha.

Egas Barros, apresia mos  ba lider hanesan Xefe Suku, ne'ebé iha inisiativa rasik hodi organiza eventu, lori Inan aman, joven, no alin kikoan sira ba amizade. Xefe Gabinete MJDAK apela mos ba joven sira katak  joven sira, banati tuir xefe suku nia dalan hodi organiza aktividade sira ho diak iha futuru oin mai. #MediaMjdak#