Dili, 8 Maio 2026 - Ministériu Juventude, Desportu, Arte no Kultura (MJDAK) realiza serimonia Tomada de Posse ba kargu diresaun no xéfia hamutuk 24 pesoas, iha Salaun Uma Nahe Biti Boot MJDAK, Lecidere, Dili.

Serimonia ne'e hala'o ho prezensa S.E. Ministru Nelyo Isaac Sarmento, akompaña husi Komisaria Funsaun Públika (KFP), Sra. Anita Tavares Pereira, no bensaun espirituál Posse husi Reverendu Padre Cesar Magno.

Tuir S.E. Ministru Nelyo Isaac Sarmento, serimonia tomada de posse ne'e reprezenta avaliasaun interna MJDAK nian — pasu deliberadu hodi reforsa programa ezistente no introduz inovasaun foun bazeia ba realidade estadu nian.

"Tomada de Posse ne'ebé ohin ita halo ne'e hanesan avaliasaun interna ida husi Ministériu nian atu nune'e iha nuansa foun no mós atu reforsa programa ne'ebé mak iha — bele ba oin ho inovasaun foun bazeia ba situasaun real... ho mudansa ba kargu ida ne'e hanesan misaun karidade ida — eskolla mai iha pozisaun ne'e atu halo buat di'ak ba ita nia nasaun, servi estadu no povu." — S.E. Nelyo Isaac Sarmento, Ministru MJDAK

Ministru Nelyo Isaac mós aprezenta mandatu klaru ba lider foun sira ne'ebé foin empoza:  Asume kargu ho responsabilidade total; Servisu iha ekipa ho koezaun no koordenasaun; Kria komunikasaun efetivu hodi rezolve problema institusionál; Kontribui ba dezenvolvimentu iha área juventude, desportu, arte no kultura.

Partisipa iha serimonia ne'e, Xefi Gabineti MJDAK no SEAK, kargu diresaun no xéfia, funsionáriu MJDAK, no família husi empozadu sira — refleta espírítu komunidade no apoiu mútuu iha prosesu renovasaun institusionál ida-ne'e.