DILI, 20 Maiu 2026 – S.E. Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha serimónia ofisiál isar bandeira nasionál hodi komemora Loron Restaurasaun Independénsia Repúblika Demokrátika Timor-Leste ba dala 24, ne'ebé hala'o iha Prasa Tasi-Tolu, Dili.

Solenidade ne'e lidera husi S.E. Presidente Repúblika, Dr. José Ramos-Horta, no konta ho prezensa husi lider altu Estadu nian, kórpu diplomátiku, veteranu sira, no komunidade tomak. Serimónia ne'e mós hetan partisipasaun husi S.E. Primeiru-Ministru Kay Rala Xanana Gusmão, hamutuk ho membru Governu sira, Prezidente Tribunál de Rekursu, Prezidente Parlamentu Nasionál, deputadu sira, no autoridade seguransa husi PNTL no F-FDTL.

Komemorasaun tinan ne'e lori signifikadu boot ba dezenvolvimentu nasionál no kbiit foin-sa'e sira nian iha future.

Atividade ne'e hametin kbiit foin-sa'e no povu tomak nian hodi hamriik hamutuk bazeia ba tema nasionál "Juntos construiremos uma pátria cada vez mais justa, inclusiva e resiliente" (Hamutuk ita harii pátria ida ne'ebé justu, inkluzivu no reziliente liu tan).

Konstrusaun nasaun nian foku liu ba kriasaun oportunidade foun ba foin-sa'e sira iha dezenvolvimentu desportu, arte, no kultura nudar pilar esensiál ba independénsia no sustentabilidade nasaun.

Selebrasaun ne'e sai hanesan naroman ida hodi haburas espíritu patriotizmu ba jerasaun foun sira ne'ebé sei sai fukun ba dezenvolvimentu nasionál, hodi asegura katak valores luta nasionál kontinua hamatan iha foin-sa'e sira.

Iha oportunidade ne'e, Ministru Nelyo Isaac Sarmento subliña katak komemorasaun Loron Restaurasaun Independénsia ba dala 24 ne'e sai momentu determinante ba jerasaun foun sira:

"Komemorasaun Loron Restaurasaun Independénsia ba dala 24 ne'e sai momentu determinante ba jerasaun foun sira hodi rona fali istória, simu fali valores pasadu nian, no sai kompromisu boot hodi harii pátria ida ne'ebé bazeia ba justisa no inklusividade."

Nia mós enkoraja foin-sa'e sira atu kontinua kontribui ba nasaun liu husi área desportu, arte, no kultura, tanba sira ne'e mak pilar importante ba identidade no dezenvolvimentu nasaun nian.

Serimónia isar bandeira ne'e la'ós de'it ritual serimoniál, maibé mós sai hanesan reafirmasaun kolektiva ba kompromisu nasaun nian atu kontinua dezenvolve Timor-Leste ho paz, unidade, no dignidade ba ema hotu.

#MediaMjdak