DILI, 22 MAIU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ne’ebé akompaña husi Xefi Gabineti MJDAK, Egas Baros Guterres Godinho, realiza enkontru ho menejer Tomas Americo Boxing Club, Junior Tomas Americo, no ekipa iha Salaun Magna MJDAK, Lecidere, Dili.

Enkontru ne’e hala’o ho objetivu prinsipál hodi husu apoiu fatin ba realizasaun kompetisaun boxing ne’ebé sei utiliza Jinaziu Desportu Dili (GDD) iha loron 23 Maiu 2026. Tuir menejer Junior Tomas Americo, atividade kompetisaun ne’e sei hala’o durante loron ida no partisipa mós husi atleta sira husi nasaun viziñu, Indonezia no Austrália, hodi anima no fó koloridu ba eventu iha Dili.

“Agradese wa’in tebes ba Sua Exelénsia nia apoiu no ita nia objetivu ohin mai hasoru Exelénsia atu husu apoiu fatin Jinaziu Desportu Dili hodi halo atividade kompetisaun boxing. Ami mós konvida ita nia maluk sira husi Indonezia no Austrália hodi partisipa no anima eventu ne’e,” dehan Junior Americo.

Hatan ba solicitasaun ne’e, Ministru Nelyo Isaac Sarmento hatete prontu atu fornese apoiu fatin ba inisiativa joven sira nian, liuliu iha modalidade boxing. “Boxing maka modalidade primeiru ne’ebé ema hotu-hotu gosta iha Timor-Leste. Governu hakarak atu investe maka’as iha boxing, tuir mai futeból, no mós modalidade sira seluk,” afirma Ministru. Nia mós reafirma komitmentu Governu nian atu kontinua apoia dezenvolvimentu desportu nasionál liuhosi fasilidade ba federasaun no klube sira.

Partisipa iha atividade ne’e mai husi menejer Tomas Americo Boxing Club hamutuk ho ekipa ne’ebé sei kompete iha kompetisaun boxing iha GDD, loron 23 Maiu 2026.

#MediaMjdak