DILI, 17 Abríl 2026 – Sua Eskelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin despede ofisialmente kontijente Timor-Leste ne’ebé sei ba kompete iha Sanya, Repúblika Populár Xina. Eventu despedida ne’e hala’o iha Salaun Magna MJDAK, Lecidere, Dili.

Timor-Leste sei haruka atleta na’in ha’at (4) hodi kompete iha modalidade rua (2) ne’ebé estratéjiku, mak hanesan: Atletizmu no Vólei Praia (Beach Volleyball).

Mensajen Ministru: Disiplina nu’udar Xave ba Susesu

Iha nia intervensaun, Ministru Nelyo Isaac Sarmento (NIS) fó hanoin ba atleta sira katak dezempeñu iha arena desportivu internasionál presiza kbiit fíziku no mentál ne’ebé boot.

"Atu sai atleta susesu, tenke iha disiplina ne’ebé aas. Rona orientasaun husi treinadór, kumpri regra jogu, no mantein konsentrasaun hodi bele hetan prestasaun ne’ebé di’ak. Labele lakon oportunidade ba treinu," dehan Governante ne’e.

Ministru NIS mós fó korajen ba atleta sira hodi labele korta estudu: "Eskola tenke la’o, maibé fila husi eskola labele haluha treinu hodi mantein fíziku. Lakon ka manan ne’e la’ós kestaun prinsipál, maibé esperiénsia ne’ebé imi hetan mak sei sai 'bukae' ba imi-nia futuru," Ministru NIS tenik hodi hato'o votu ba bom susesu.

Detalla Kontijente no Kalendáriu

Xefe Delegasaun husi Komité Olímpiku Nasionál Timor-Leste (CONTL), Vicente Carvalho da Silva, informa katak delegasaun ne’ebé hamutuk ema na’in 10 (atleta 4, treinadór 2, no ofisiál 4) sei arranka ba Xina iha loron 19 Abríl 2026.

Abertura: Loron 22 Abríl 2026, iha Sanya, Xina. Enserramentu: Loron 30 Abríl 2026.

Retornu: Atleta Atletizmu sei fila uluk iha loron 27 Abríl, enkuantu ekipa Vólei Praia sei maktuir to’o serimónia enserramentu no  sei to’o fali iha Timor-Leste iha loron 1 Maiu 2026.

Partisipa mós iha serimónia despedida ne’e, Xefe Gabinete MJDAK, Egas Barros Guterres Godinho, no CONTL.

#MídiaMJDAK