DILI, 15 Abríl 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha sorumutu Konsellu Ministru (KM) ne’ebé hala’o iha Palásiu Governu, Dili. Iha sorumutu ne’e, Governu foti desizaun importante lubuk ida, inklui kria komisaun ba projetu Sentru Konvensaun Internasionál no aprova pagamentu ba débitu eventu desportivu sira iha pasadu.

Infraestrutura no Dezenvolvimentu Ekonómiku

Governu aprova Rezolusaun ne’ebé aprezenta husi Vise-Primeiru-Ministru, Francisco Kalbuadi Lay, hodi kria Komisaun Interministeriál ba Akonpañamentu Projetu Konstruksun Sentru Konvensaun Internasionál. Projetu ne’e konsidera hanesan inisiativa estratéjiku hodi dudu dezenvolvimentu ekonómiku, turizmu, no dignifika sidade Dili.

Komisaun ne’e sei iha grupu serbisu rua: ida foku ba kadiak tékniku no kualidade obra, no ida seluk ba koordenasaun interministeriál hodi asegura projetu ne’e la’o tuir prazu no kbiit finanseira ne’ebé iha.

Desportu: Regularizasaun Débitu Pasadu

Iha setór desportu nian, KM aprova Rezolusaun ne’ebé aprezenta husi Ministra Finansas hodi fó doasun hamutuk $631.478,11 ba Noble Timor. Verba ne’e destina ba selu débitu pendente sira husi organizasaun eventu desportivu boot sira iha pasadu, hanesan: Tour de Timor (2012), Maratona de Dili (2018),Suai Extreme (2018).

Desizaun ne’e viza ba kumpri obrigasaun finanseira Estadu nian ba eventu sira ne’ebé fó ona kontribuisaun ba imajen internasionál Timor-Leste nian iha mundu desportu no turizmu.

Saúde: Preparasaun ba Eventu Rejionál OMS

Ministra Saúde, Élia Amaral, aprezenta preparasaun ba Reuniaun Komité Rejionál OMS ba Sudeste Aziátiku (OMS-SEARO) ne’ebé Timor-Leste sei sai nian-na’in (anfitrião) iha sidade Dili, entre loron 7 to’o 9 Setembru 2026. Alende ne’e, Governu aprova mós Dekretu-Lei hodi atualiza taxa laboratoriu nian ne’ebé la troka ona durante tinan 15, hodi aumenta kualidade serbisu hosi tipu ezame 38 ba liu 150.

Diploma no Kooperasaun Internasionál

KM aprova mós proposta sira seluk hanesan:

Orgánika foun MNEC: Adeka ba estrutura IX Governu nian ne’ebé inklui kargu Vise-Ministra MNEC.

Adezasaun ba GPA-OMC: Kria ekipa negosiasaun ba Government Procurement Agreement (GPA) hodi garante transparénsia iha kontratu públiku.

Reuniaun CPLP: Hili tema “Aprofunda Kooperasaun Ekonómika no Komersiál iha CPLP: Oportunidade no Dezafiu” ba enkontru Ministru Komérsiu CPLP iha fulan-Juñu 2026.

Selebrasaun Loron Restaurasaun Independénsia

Ba loron 20 Maiu ne’ebé sei mai, KM hili ona tema ofisiál: “Hamutuk ita sei harii Pátria ida ne’ebé justu liu, inkluzivu no reziliente” hodi selebra tinan 24 Restaurasaun Independénsia Repúblika Demokrátika Timor-Leste.

#MídiaMJDAK