DILI, 01 Abril 2026  – Konsellu Ministrus (KM) hala’o sorumutu ordináriu iha Palásiu Governu, kuarta-feira ne’e, hodi foti desizaun importante balu ne’ebé kobre área kultura, infraestrutura, enerjia, no restruturasaun nakloke ba administrasaun públika.

Kultura no Identidade: Timor-Leste sai Uma-na’in ba CPLP

Iha sorumutu ne'e, tuir proposta ne’ebé aprezenta husi Ministru Juventude, Desportu, Arte no Kultura (MJDAK), Exelénsia Nelyo Isaac Sarmento, Konsellu Ministrus delibera hodi aprova tema ba Sorumutu Ministrus Kultura CPLP ba dala-14.

Eventu internasionál ne’ebé Timor-Leste sei organiza iha loron 4 no 5 fulan-maiu tinan 2026 ne’e, sei lori tema: “Salvaguarda Eransa Kulturál, iha Promosaun Identidade no Sidadania”. Aprovasaun ba tema ne’e nu’udar pasu ida hodi hametin kooperasaun kulturál iha espasu luzófonu no afirma kbiit kultura nian ba konsolidasaun Estadu Direitu Demokrátiku.

Omenajen ba Preladu Katóliku sira

Governu aprova mós Rezolusaun ida hodi aloka orsamentu ho valór to’o USD rihun 600 ba prosesu transladasaun restus mortais (isin-mate) husi preladu katóliku na’in-haat ne’ebé hala’o knaar pastorál iha Timor-Leste. Isin-mate Dom Jaime Garcia Goulart, Dom José Joaquim Ribeiro, Monseñór Martinho da Costa Lopes, no Dom Alberto Ricardo da Silva sei lori husi Portugál mai deskansa iha Katedrál Dili, nu’udar rekoñesimentu ba sira-nia legadu espirituál no istóriku ba identidade nasionál.

Investimentu iha Estrada no Rezerva Enerjia

Hodi garante dezenvolvimentu infraestrutura bázika, KM autoriza despeza ba obra emerjénsia no konstrusaun estrada foun iha munisípiu oioin, ho totál investimentu ne’ebé hamutuk maizumenus USD millaun 9,6. Obra sira-ne’e kobre área: Estrada Emerjénsia Larigutu-Uaguia (USD 3,05 millaun); Estrada foun Asumau-Liurai-Remexio (USD 1,96 millaun); Estrada Tutuluro-Mindelo-Binani (USD 2,7 millaun); no Muru Retensaun iha mota Tibar (USD 1,56 millaun).

Iha parte enerjia nian, Governu autoriza despeza ho montante USD millaun 168,8 hodi sosa gazóleu litru millaun 80. Desizaun ne’e nudar medida antesipasaun hodi garante rezerva seguransa kombustível to’o tinan ne’e nia rohan, tanba instabilidade konflitu iha Médiu Oriente ne’ebé bele fó impaktu ba kbiit enerjétiku iha rain laran.

Reforma Administrativa no Estinsaun Entidade

Konsellu Ministrus mós aprova reforma estruturál balu, inklui:

Estinsaun MCA-TL: Aprova estinsaun ba Millennium Challenge Account – Timor-Leste, IP, hafoin remata tiha programa kooperasaun ho Estadus Unidus Amérika iha área bee no saneamentu.

RAEOA: Define modelu organizasaun foun ba kargu diresaun no xefia iha Oekusi Ambenu, hodi aliña ho estrutura administrasaun territoriál nasionál.

Turizmu no Ambiente: Altera orgánika Ministériu Turizmu no Ambiente hodi integra kompeténsia sira husi Autoridade Nasionál ba Kombate Alterasaun Klimátika, ho objetivu atu halakon redundánsia no aumenta efisiénsia servisu Estadu nian.

Sorumutu ne’e lidera husi Primeiru-Ministru no konta mós ho partisipasaun husi membru Governu sira seluk.

#MídiaMJDAK