DILI, 16 Abríl 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, simu vizita despedida husi Embaixadór Malaysia iha Timor-Leste, Dato Amarjit Sarjit Singh, iha Salaun Magna MJDAK, Lecidere, Dili, kinta-feira ne’e.

Sorumutu ne’e viza hodi fó agradesimentu ba servisu no dedikasaun Embaixadór nian ne’ebé besik remata ona nia misaun diplomátika iha Timor-Leste, liuliu iha dezenvolvimentu setór estratéjiku sira ne’ebé Ministériu tutela.

Apoiu ba Sepak Takraw no Desportu Inkluzivu

Iha biban ne’e, Ministru Nelyo Isaac Sarmento (NIS) fó koñesimentu ba apoiu boot ne’ebé Embaixadór Dato Amarjit fó ona ba dezenvolvimentu desportu Sepak Takraw iha Timor-Leste. Malaysia, nu’udar nasaun ne’ebé iha koñesimentu boot iha modalidade ne’e, ajuda ona federasaun nasionál hodi dezenvolve talentu foin-sa’e sira nian.

"Ita hatene katak Embaixadór fó atensaun boot tebes ba Sepak Takraw. Ita espera katak federasaun bele kontinua dezenvolve di’ak liután buat ne’ebé Embaixadór rai hela. Alende ne’e, ami mós ko’alia kona-ba fokus atensaun ba desportu Paralímpiku no serbisu husi Organizasaun Anti-Dopajen, hodi asegura katak desportu iha Timor-Leste la’o ho kualidade no inkluzivu," dehan Governante ne’e.

Koperasaun ba Futuru

Maski misaun Embaixadór Dato Amarjit atu remata, Ministru NIS esplika katak relasaun bilaterál ho Malaysia tenke kontinua metin. Ministru husu ba Embaixadór atu, wainhira fila fali ba Malaysia, kontinua sai "ponte" hodi enkoraza organizasaun desportu no kultura sira iha Malaysia atu kria koperasaun foun ho Timor-Leste.

"Ami troka hanoin mós iha área juventude, arte no kultura. Ne’e hanesan agradesimentu ba nia prezensa durante ne’e. Ita espera katak Embaixadór foun ne’ebé sei troka, bele kontinua koperasaun di’ak sira ne’ebé estabelese ona," Ministru NIS tenik.

Iha sorumutu ne’e, Ministru NIS akompaña husi Diretór Jerál Desportu (DJD), João M. Rodrigues, no Xefe Gabinete, Egas Barros Guterres Godinho.

#MídiaMJDAK