DILI, 24 Marsu 2026 (Mídia MJDAK) – Sua Excelência Ministru Juventude, Desportu, Arte no Kultura (MJDAK), Nelyo Isaac Sarmento, hala’o sorumutu kordenasaun ho Xefe Kaza Sivíl Prezidénsia Repúblika, Sra. Henriqueta Maria da Silva, hodi diskute preparasaun ba eventu boot Dili Internasionál Maratona (DIM), ne’ebé sei realiza iha fulan-Agostu tinan ne’e.

Sorumutu ne’ebé hala’o iha Salaun Magna MJDAK ne’e, partisipa mós husi Adjunta Xefe Kaza Sivíl, Sra. Graziela Fátima Liu Soares. Objetivu prinsipál husi inkontru ne’e mak atu asegura kordenasaun ne’ebé metin entre Prezidénsia Repúblika nu’udar inisiadór no MJDAK nu’udar ezekutór ba programa desportu nian iha rai-laran.

Iha biban ne’e, Xefe Kaza Sivíl, Sra. Henriqueta Maria da Silva, subliña katak DIM tinan ida-ne’e mai ho tema: “Mai Ita Halai Hodi Hadomi Ita-nia Rai-Laran no Animál Fuik Sira”. Tema ida-ne’e hili ho vizaun atu hametin konsiénsia públika kona-ba importánsia konservasaun ambientál, protesaun ba floresta, no proteje fauna (animál fuik) iha Timor-Leste.

“Prezidénsia Repúblika la’ós órgaun ezekutór, tan ne’e Sua Excelência Presidente da República husu nafatin ba MJDAK atu lidera prosesu ida-ne’e. Ami hakarak institusionaliza programa inisiativa Prezidente nian ne’e ba iha sistema governativa liuhusi ministériu ida-ne’e,” tenik Xefe Kaza Sivíl.

Preparasaun DIM 2026 hahú sedu hodi garante kualidade eventu nian ne’ebé di’ak liután. Alende maratona ba kategoria profisionál, sei iha mós marsa maratona hodi promove domin ba natureza. Alvu ba tinan ida-ne’e mak atu dada partisipasaun husi atleta internasionál hamutuk na’in-500, inklui atleta lokál sira.

Kategoria sira ne’ebé sei kobre iha DIM 2026 mak: Full Marathon: 42 Kilómetru ; Half Marathon: 21 Kilómetru ; Kategoria Jerál: 10 Kilómetru no Fun Run / Família: 5 Kilómetru.

Liuhusi DIM 2026, MJDAK no Prezidénsia Repúblika hein katak bele haburas dezenvolvimentu desportu atletizmu iha rai-laran, aumesmu tempu promove Timor-Leste nu’udar destinasaun turizmu desportivu ne’ebé hadomi ambiente.

#MídiaMJDAK