Likisa, 6  Maio 2026 - Ministériu Juventude, Desportu, Arte no Kultura (MJDAK) reafirma nia kompromisu estratéjiku ho Uniaun Nasional Eskuteiru Timor-Leste (UNE-TL) liuhosi partisipasaun ofisiál iha serimonia tomada de posse ba estrutura foun Konsellu UNE-TL Munisipiu Likisa, ne'ebé hala'o iha Edifísiu Eskola Pré-Sekundária Hu Iso Lara Iso 01, iha loron 06 de Maio de 2026.

Eventu ne'e marka momentu importante ida iha relasaun kolaborativu entre MJDAK no UNE-TL, reforsa papel organizasaun eskuteiru nian hanesan instrumentu komplementár governu nian iha implementasaun Polítika Nasionál Juventude, liu-liu ba joven husi tinan 15 to'o 24.

"UNE-TL hanesan parseiru estratéjiku ida husi Ministériu — governu liu husi Ministériu sei kontinua apoiu UNE-TL, tanba organizasaun ne'e iha papel importante hodi tulun governu forma karakter joven sira nian, tuir Polítika Nasionál Juventude."— Mario Tilman, Diretór Jerál Juventude, MJDAK

Rezultadu signifikativu seluk mak komposisaun estrutura foun ne'e rasik: maioria membru mai husi setu edukasaun, ne'ebé kria kondisaun direta ba UNE-TL hodi hetan asesu ba estudante sira iha eskola — grupu-alvu prinsipál polítika juventude nian. Iha kontextu ne'e, estrutura foun iha kapasidade aas liu atu implementa programa no atividade ho impaktu real iha nivel munisipiu.

Tomada de posse ne'e demonstra determinasaun governu nian hodi kontinua reforsa estrutura organizasaun juventude iha nivel munisipiu, hanesan mekanizmu esensial ba dezenvolvimentu kapasidade no karakter joven Timor-Leste nian.