DILI, 23 Abríl 2026 (GCI/MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala’o sorumutu ordináriu ho Prezidente Federasaun Futeból Timor-Leste (FFTL), Nilton Telmo Gusmão, no Prezidente Liga Futeból Timor-Leste (LFTL), Ipolito Soares, hodi diskute preparasaun ba re-ativasaun kompetisaun futeból nasionál. Sorumutu ne’e hala’o iha Salaun Magna MJDAK, kinta-feira ne’e.

Iha biban ne’e, Governu liuhusi MJDAK ofisializa apoiu finanseiru ho montante USD 500,000.00 (Dolar Amerikanu Rihun Atus Lima) ba Orgaun Liga Futeból Timor-Leste (OLFTL). Orsamentu ne’e destinadu hodi fásilita no garante ezekusaun ba programa Liga Futeból nian ne’ebé planeia ona ba tinan 2026.

Kalendáriu no Objetivu Kompetisaun

Tuir kalenderizasaun ne’ebé fiksa ona, kompetisaun Liga Futeból nian sei hahú hala’o iha loron 22 Maiu 2026. Apoiu ne'e sai nu'udar pasu estratéjiku husi Governu hodi fó hikas espasu ba dezenvolvimentu desportu futeból iha rai-laran hafoin paradu durante tempu balun.

Ministru Nelyo Isaac Sarmento subliña katak objetivu fundamentál husi apoiu ne’e mak hodi fó oportunidade ba klube sira atu kompete fila-fali, nune’e bele identifika talentu foun sira. Alende ne’e, kompetisaun ne’e mós nu’udar faze ida hodi mantein performansa futebolista sira nian hodi bele reforsa kualidade Selesaun Nasionál iha futuru.

Fortalesimentu Institusionál

Iha sorumutu ne’e, parte FFTL no LFTL hato’o mós sira-nia apresiasaun ba kompromisu Governu nian ne’ebé kontinua tau prioridade ba setór desportu, liuliu futeból ne’ebé sai hanesan desportu ne’ebé komunidade barak liu gosta. Ho apoiu finanseiru ne’e, parte organizadora deklara prontu ona hodi kria kompetisaun ida ne’ebé profisionál no foun hodi anima fali sarani no amante futeból iha territóriu tomak.